24 майнинг эътиборга молик янгиликлари — «Дарё» дайжестида.
Ўзбекистон Республикаси Президенти Шавкат Мирзиёев 24 май куни Тошкентдаги талабалар шаҳарчасида амалга оширилаётган бунёдкорлик ишлари билан танишди.
Сўнг Ўзбекистон Миллий университетида олий таълим ва илмий-тадқиқот муассасалари раҳбарлари, академиклар, олимлар, ёш тадқиқотчилар билан учрашди.
Президент жорий йил 1 сентябрдан барча давлат ташкилотларида илмий-педагогик фаолият билан шуғулланаётган, таълим ва илм-фан соҳасида фаолият олиб бораётган фан номзодларининг ойлик маошларига 30 фоиз, фан докторлари учун эса 60 фоиз устама ҳақи белгилашни таклиф қилди.
Шу учрашувда Президент ЎзМУ талабаси Сардор Бозорбоевнинг иштиёқи, ташаббускорлиги ва Ватан равнақи йўлидаги фидойилиги учун «Ўзавтосаноат» АЖ бошқаруви раиси Шавкат Умирзоқовга у учун автомобиль ажратиш бўйича кўрсатма берди.
Шунингдек, Шавкат Мирзиёев талабага лойиҳасини амалга ошириш учун зарур маблағни ажратиш бўйича кўрсатма берди.
***
Самарқандда 33 ёшли эркак ўзига бензин қуйиб, ёқиб юборди.
Эркак ўзининг устига бензин қуйиб, ёқиб юборган. Яқин қариндошлари унга биринчи ёрдамни кўрсатишга улгуриб қолган ва 33 ёшли фуқарони Республика шошилинч ёрдам илмий-тадқиқот маркази Самарқанд филиалига олиб борган.
***
Қонунчиликда «милиция» сўзи бутунлай ишлатилмайдиган бўлди.
Ўзбекистон Республикаси Президенти «Ўзбекистон Республикасининг айрим қонун ҳужжатларига жиноят процесси иштирокчиларининг ҳуқуқлари ҳимоя қилинишини таъминлаш билан боғлиқ ўзгартиш ва қўшимчалар киритиш тўғрисида»ги қонунни имзолади.
Унга мувофиқ, Ўзбекистон Республикасининг Маъмурий жавобгарлик тўғрисидаги кодексида «Милиция ходимининг» деган сўзлар «Ички ишлар органлари ходимининг» деган сўзлар билан алмаштирилди.
***
Навоийда аттракциондан йиқилиб жароҳат олган актёр Баҳром Ёқубовга қарийб 100 млн сўм моддий зарар ундириб берилди.
Бахтсиз ҳодиса оқибатида Баҳром Ёқубовнинг қўли ва оёғи синган, ўнг юзи фақатгина пластик жарроҳлик ёрдамида тикланиши мумкинлиги айтилган эди. Шунингдек, бурни ва жағига етган шикаст кўз косаси синиши ҳамда бир кўзидан айрилиши билан якун топган.
***
Гулнора Каримованинг фуқаровий эри Рустам Мадумаровга тегишли яна бир мулк — Perfectum савдога қўйилди.
Очиқ аукцион нархни тушириб бориш йўли билан, демпинг усулида ўтказилиши кўрсатилган савдода мазкур мулкнинг бошланғич нархи 205 587 016 500 сўм этиб белгиланган.
Изоҳ (0)