Андижон туманининг Гумбаз маҳалласида ўтказилган сайёр суд мажлисида 1946 йилда туғилган Абдураззоқ Абдуллаевга (исм-шарифлар шартли) нисбатан суд ҳукми ўқилди. Бу ҳақда «Дарё»га жиноят ишлари бўйича вилоя суди судья катта ёрдамчиси Комроншоҳ Расулов хабар берди.
Жиноят ишлари бўйича Андижон туман суди раиси Абдулҳаким Тўраевнинг маълум қилишича, суд мажлисида А.Абдуллаев 2018 йилнинг 25 ноябрь куни уйида 60 минг сўм эвазига Ниёзбек Зоҳидов ва Моҳира Турсуновага шаърий никоҳ ўқиб, диний маросимлар ўтказиш қоидаларини бузганлиги аниқланди.
Шунингдек, судланувчига нисбатан бунга қадар Булоқбоши туман маъмурий судининг 2018 йил 14 июндаги қарорига мувофиқ маъмурий жазо қўллангани, бундан тўғри хулоса чиқармаганлиги аниқланди.
Суд мажлисида А.Абдуллаев айбига иқрор бўлиб, никоҳ ёки бошқа диний маросимлар ўтказиш учун рухсатномаси йўқлиги, 2018 йил 25 ноябрь куни хонадонига таниши Н.Зоҳидов келиб, М.Турсунова билан турмуш қурмоқчи эканлигини айтиб, никоҳ ўқиб қўйишни сўрагани, уларнинг турмуш қуришга розилигини аниқлаб, шаърий никоҳларини ўқиб қўйгани, эвазига 60 минг сўм олгани, қилмишидан пушаймонлигини билдирган.
Гувоҳ Муҳайё Турдиева судда 2009 йилда маҳалладоши Н. Зоҳидов билан қонуний никоҳдан ўтгани, икки нафар фарзанди борлиги, оилавий келишмовчиликлар натижасида эри уйдан кетиб қолгани, лекин расман ажрашмаганлигини маълум қилган. Ички ишлар вазирлигининг электрон манзилига мурожаат қилиб, шаърий никоҳни ўқиган шахсга нисбатан чора кўришни сўраган.
Ўзбекистон мусулмонлари идораси Андижон вилояти вакиллиги томонидан судланувчи А.Абдуллаевга диний фаолият олиб бориш, хусусан, диний таълим бериш, аҳоли орасидаги диний расм-русумлар ва маросимларни ўтказиш бўйича ваколат берилмагани ҳақида хулоса шаклидаги маълумотнома берилган.
Суд ҳукми билан А. Абдуллаев Жиноят Кодексининг 217-моддаси 2-қисмида назарда тутилган жиноятни содир этганликда айбли деб топилди ва унга энг кам ойлик иш ҳақининг 7 баравари — 1 миллион 419 минг 111 сўм миқдорида жарима жазоси тайинланди.
Изоҳ (0)