Эрон кам бойитилган уран ишлаб чиқаришни деярли тўрт баравар оширди. Бу ҳақда Эрон Атом энергияси ташкилоти вакили Бехруза Камалвандига таяниб, Tasnim агентлиги хабар берди.
Камалванди Эрон 20 майдан бошлаб ядро ёқилғиси ишлаб чиқаришни оширишга қарор қилганини маълум қилди. Унинг таъкидлашича, мамлакат бу ҳақда Атом энергияси бўйича халқаро ташкилот (MAGATE)ни хабардор қилган.
Шу билан бирга, Камалвандининг сўзларига кўра, қарор сентифуглар миқдорининг ортганини англатмайди. Эрон бойитилган уран ҳажмини фақат мавжуд ишлаб чиқариш қувватини ишга солган ҳолда 3,67 баробарга оширган.
15 май куни Эрондан таҳдид хавфи бўлгани сабабли АҚШ армияси ўзининг Ироқдаги ҳарбийларини юқори даражадаги тайёргарликка келтирган эди. Шу куни Эрон ядро дастурига оид Умумий кенг кўламли ҳаракатлар режаси (Joint Comprehensive Plan of Action)да назарда тутилган ядровий дастур бўйича айрим мажбуриятларни бажаришни расман тўхтатган.
Шундан сўнг Теҳрон уранни бойитиш бўйича ишларни давом эттириши ва уни четга сотиши, шунингдек, Арак шаҳрида жойлашган оғир сувда ишлайдиган реактор модернизациясини тўхтатиши мумкин. Эрон раҳбарияти агар битимнинг бошқа иштирокчилари 60 кун мобайнида келишув шартларига эришмаса, шундай йўл тутишини маълум қилган.
Эроннинг бундай қарорга келишига АҚШнинг ядро битимини бузгани ва санкциялар жорий этгани сабаб қилиб кўрсатилмоқда.
Изоҳ (0)