Шимолий Кореянинг бош ахборот агентлиги (Корея марказий телеграф агентилиги — КМТА) АҚШ собиқ вице-президенти Жо Байденнинг сайловолди нутқида айтган фикрларига кескин муносабат билдирди. Бу ҳақда «Интерфакс» хабар берди.
«Демократлар партиясидан президентликка номзод Жо Байден ўзининг яқинда ўтказган сайловолди кампаниясида сўзлаган нутқида бутун КХДР олий раҳбариятига туҳмат қилди», — дейилади КМТА баёнотида. «Унинг айтган сўзлари, сиёсий жиҳатини қўя турайлик, оддий инсоний ҳислатлардан маҳрум бўлган онгсиз одамнинг сафсатасидир», — деб қайд этилган мақолада.
«Унинг номзодига тўхтовсиз фикр билдирилаётгани, унга ишонч билдириш керак эмаслиги, интеллектуал даражаси паст бўлган аҳмоқ эканлиги кулгуга олинаётгани ҳам тасодиф эмас», — дейилади мақолада. Агентлик, шунингдек, Байден обрўсига путур етказувчи бир қатор айбловларни ҳам қайд этиб ўтган.
Бундан ташқари, агентлик Байден 2011 йили Барак Обама нутқ сўзлаётганида ухлаб қолиб «кулгига қолганлиги»ни ҳам эслатиб ўтган. КМТАнинг билдиришича, Шимол «КХДР олий раҳбариятига тил теккизган ҳар қандай кишини ҳеч қачон кечирмайди» ва шубҳасиз, «бунга жавоб беришга мажбур» қилади.
Байден ўзининг сайловолди нутқида АҚШ Россия президенти Владимир Путин, Шимолий Корея раҳбари Ким Чен Ин каби «диктаторлар ва тиранлар»га президент Трампга ўхшаб қучоқ очмаслиги кераклигини айтган.
Байден Обама президентлик қилган 2009—2017 йилларда вице-президент лавозимида ишлаган. У апрель ойида 2020 йилги сайловолди кампаниясида иштирок этиш учун ўз номзодини илгари сурди.
Изоҳ (0)