Жиноят ишлари бўйича Фарғонанинг Фурқат туман судида фирибгарлик содир этган А.Мирзаева нисбатан суд ҳукми ўқилди. Олий суд матбуот хизматининг хабарига кўра, аёл аввал ҳам бир неча бор фирибгарлик, яъни ўзганинг мулкини алдаш ёки ишончини суиистеъмол қилиш йўли билан қўлга киритиш жиноятини содир этган.
Маълум бўлишича, А. Мирзаева 2017 йил 18 декабрь куни соат 11:00 ларда Фурқат тумани марказига келиб, фуқаро Ш.Турсунова (Жўраева)нинг ишончига кирган. Унга икки дона тилла занжирларни кўрсатиб, ушбу тилла тақинчоқлар эвазига пул бериб туришини сўрайди. Пулларини 10—15 кун ичида қайтариб олиб келиб беришини ва тилла тақинчоқларини қайтариб олишини айтади.
Фирибгар аёл Ш.Турсуновадан 100 доллар ва 1 650 000 сўм пул маблағларини олади. Сўнг ўзи берган тилла занжирларни ўраб беришини айтиб, ушбу тилла занжирларни қайтариб олади. Турсунованинг чалғиганидан фойдаланиб, бу тилла занжирлар ўрнига ўзи томонидан олдиндан тайёрлаб қўйилган, салфеткага ўраб скотчланган, сариқ металлдан ясалган икки дона браслет ва сариқ металлдан ясалган бир дона занжирни беради.
У арзимаган нархдаги «зеб-у зарларини» гаров сифатида топширади ва қайтиб келгунига қадар очмасликни тайинлаб, ҳодиса жойидан ғойиб бўлган.
А. Мирзаева ҳуқуқ-тартибот ходимлари томонидан қўлга олинди. У Жиноят кодексининг 168-моддаси 3-қисми «б» банди (фирибгарлик, яъни алдаш ёки ишончни суиистеъмол қилиш йўли билан ўзганинг мулкини ёки ўзганинг мулкига бўлган ҳуқуқни қўлга киритиш) билан айбдор деб топилиб, суд томонидан тегишли тартибда жазо тайинланди.
Изоҳ (0)