Хоразм вилоятида умумий ўрта таълим мактаблари 11-синф битирувчиларининг олий таълим муассасаларига кириш учун тайёргарлик жараёнларини аниқлаш юзасидан синов тест жараёнлари ўтказилди. Бу ҳақда Халқ таълими вазирлиги маълум қилди.
11-синф битирувчиларида олий таълимга тест топширишда кўникма ҳосил қилиш мақсадида барча туманларга йўналишларни аниқ белгилайдиган, ўқувчи томонидан ишланган тестларни компьютер техника воситасида текшириш имкониятини берувчи ва ҳар бир йўналиш бўйича балларини аниқ чиқариб бера оладиган дастурлар ўрнатилди.
Шунингдек, 57 мингдан ортиқ тест базаси асосида 1-босқичда вилоятдаги 11-синф битирувчиларининг 8296 нафаридан синов тестлари олинди. Синов тестларида қатнашган ўқувчиларнинг 566 нафари давлат гранти, 381 нафари шартнома асосида, жами 947 нафарни (жами 11-синф битирувчиларига нисбатан 4,63 фоиз, тест топширган ўқувчиларга нисбатан 11,42 фоиз) ташкил этди.
Жараёнга жалб этилган 8296 нафар ўқувчидан 7340 нафари (88,4 фоиз) эса бугуни кунда олий таълимга тайёргарлик даражаси паст эканлиги аниқланди.
2019 йил 14—16 май кунлари эса мазкур жараённинг 2-босқичи ўтказилди. Унга 10189 нафар 11-синф битирувчиси жалб қилинди. Синов тестларида қатнашган ўқувчиларнинг 391 нафари давлат гранти, 844 нафари шартнома асосида, жами 1235 нафарни (жами 11-синф битирувчиларига нисбатан 6,04 фоиз, тест топширган ўқувчиларга нисбатан 12,12 фоиз) ташкил этди.
1-босқичга нисбатан олий таълимга кириши мумкин бўлган ўқувчилар сони 288 нафарга ошди. Шунингдек, тест топширган ўқувчиларнинг 6787 нафари ўтган йилги кириш балларидан паст балл тўплаган бўлса, 2563 нафари (1-босқичга нисбатан 1758 нафарга камайган) эса жавоб варақаларини бўяшдаги хатоликлар туфайли етарлича балл тўплай олмаган.
Ушбу жараён ўқувчиларга олий таълим муассасаларига кириш имтиҳонлари жараёнларини олдиндан ҳис қилиб, ўзларидаги мавжуд камчиликларини бартараф қилиш имкониятини яратди.
Изоҳ (0)