Жиззах вилояти тарихи ва маданияти давлат музейида «Орол денгизи фожиаси» деб номланган кўчма фото-кўргазма ташкил этилди, деб хабар беради ЎзА.
Ўзбекистон давлат табиат музейи томонидан ташкил этилган кўргазма фуқаролар, хусусан, ёшлар ўртасида экология ва атроф-муҳит муҳофазасига эътиборни кучайтириш, Орол денгизи фожиаси асоратларини юмшатиш борасида амалга оширилган ишлар билан аҳоли таништиришга хизмат қилади.
Орол денгизининг қуриши минтақа аҳолисининг энг долзарб муаммоси бўлиб қолмоқда. Маълумотларга кўра, денгиз қуриши оқибатида шўрланишнинг тезлашуви сўнгги йилларда 50 минг гектарга яқин экин майдонини яроқсиз ҳолга келтирган.
Орол фожиаси асоратларини юмшатиш мақсадида Ўзбекистонда таъсирчан чора-тадбирлар амалга оширилмоқда. Ўтган йили Нукус шаҳридан 400 километр олисдаги Возрождение оролининг «Шағала» деб номланувчи ҳудудидан – Орол денгизининг қуриган майдонидан ичишга яроқли сув топилган эди. Чучук сув манбаси Жанубий Орололди артезиан ҳавзасининг Бўр даври ётқизиқларида, яни 260—280 метр чуқурликда аниқланган. Оролбўйи дала гидрогеологик экспедицияси томонидан жорий йилда Мўйноқ тумани ҳудудидаги Возрождение ороли, Сурғил, Ахантай текисликларида яна 40 та сув кўзларини очиш режалаштирилган.
Кўргазма 31 майга қадар давом этади.
Изоҳ (0)