Бугун, 15 май куни Тошкент шаҳридаги Ўзекспомарказ павильонида «Ўзбекистон Нефть ва гази– OGU 2019» 23- Халқаро кўргазмаси, «Энергетика, энергияни тежаш, атом энергетикаси, энергиянинг муқобил манбалари – Power Uzbekistan 2019» 14- Халқаро кўргазмаси ва Халқаро Ўзбекистон энергетика конференциясининг очилиши маросими бўлиб ўтди. Бу ҳақда «Дарё» мухбири Севара Нишонова хабар берди.
Тадбирларнинг очилиш маросимида Ўзбекистон энергетика вазири Алишер Султонов, «Росатом» давлат корпорацияси бош директори Алексей Лихачёв, Буюк Британия Қироллиги ва Шимолий Ирландиянинг Ўзбекистондаги элчиси Кристофер Аллан сўзга чиқди.
Ўзбекистон энергетика вазири Алишер Султоновнинг таъкидлашича, бундай кўргазмалар Ўзбекистон энергетика соҳаси учун зарур.
«Ўзбекистон Президенти Шавкат Мирзиёевнинг ташаббуси билан мамлакатда газ ва электр таъминоти объектларини қайта тиклаш ва модернизация қилиш, янги генерация объектлари ва электр тармоқларини қуриш, қайта тикланувчан энергия манбаларини ривожлантиришга қаратилган кенг кўламли ислоҳотлар ўтказилмоқда. Шунингдек, соҳага инвестиция жалб қилиш, хусусан давлат-хусусий шерикчиликни ривожлантиришга ҳам алоҳида эътибор берилмоқда», — дейди ўз нутқида Алишер Султонов.
«Росатом» давлат корпорацияси бош директори Алексей Лихачёв халқаро энергетика конференциясида муҳокама қилинадиган мавзуларга тўхталди.
«Ушбу конференция ўзбекистонлик шерикларимизни АЭС қурилиши локализацияси, атом блокларини қуришда ‘Росатомънинг ўзида барча замонавий хавфсизлик тизимларини жамлаган илғор технологияларини қўллашга кенгроқ жалб этиш мақсадида ташкил этилмоқда. Конференцияда, шунингдек ушбу лойиҳанинг ижтимоий ва иқтисодий жиҳатлари, энергетика хавфсизлиги соҳасига илғор Россия механизмларини татбиқ этиш масалалари ҳам муҳокама этилади», — дейди «Росатом» бош директори Алексей Лихачёв.
Ўзбекистон ёқилғи-энергетика соҳасидаги энг муҳим тадбир 17 майга қадар давом этади.
16 май куни Ўзбекистондаги илк халқаро конференция — Power Uzbekistan 2019 расман ўз ишини бошлайди.
Кўргазмалар ва конференциялар ишида 31 мамлакатнинг 300 дан ортиқ компаниялари ва 1000 нафар делегатлар иштирок этади, шу жумладан: Австрия, Озарбайжон, Беларусь, Бельгия, Венгрия, Буюк Британия, Вьетнам, Германия, Дания, Ҳиндистон, Индонезия, Италия, Испания, Қозоғистон, Канада, ХХР, Корея Республикаси, Литва, Монако, Норвегия, БАА, Польша, Россия, Сингапур, АҚШ, Туркия, Ўзбекистон, Украина, Франция, Швейцария ва Япония.
Ўтказиладиган тадбир доирасида Энергетика вазирлиги, АЖ «Ўзбекнефтегаз», «ЎзАтом» Агентлигининг компаниялари ва бўлинмаларининг раҳбар ходимларини хорижий делегациялар ва компаниялар раҳбарлари билан B2G ва B2B учрашувлари режалаштирилган. Бундай кўринишдаги учрашувлар форум вақтида иштирокчилар ишининг самарасини сезиларли даражада оширади ва мавжуд алоқаларни янада ривожланишига, ҳамда нефтгаз тармоғига инвестицияларни жалб қилишга кўмак беради.
Изоҳ (0)