8 май куни жиноят ишлари бўйича Бахмал туман судининг очиқ, сайёр суд мажлиси Бахмал тумани Барлос ҚФЙ биносида С.Н.Эргашев раислигида, Ўзбекистон Республикаси ЖКнинг 266-моддаси 2-қисми билан айбланган Шуҳрат Жабборовга нисбатан юритилган жиноят иши кўриб чиқди. Бу ҳақда Жиноят ишлари бўйича Бахмал туман судининг раиси С.Эргашев «Дарё»га маълум қилди.

Шуҳрат Жаббаров 2016 йил 23 июль куни соат 20:30 ларда бошқарувида бўлган «Vortex Эстина» русумли, М 817 ЕН 161 давлат белгили автомашинада Россия Федерациясининг Ростов-Дон шаҳри Первомайск тумани ҳудудидаги «Менжинский» кўчасидан «Российский» кўчаси томонга ҳаракатланиб бориш вақтида амалдаги «Йўл ҳаракати қоидалари»нинг 77-бандида ҳамда 78-бандида кўрсатилган «Йўл ҳаракати қоидалари»ни бузиб, транспорт воситасини белгиланган тезликдан ошириб бошқариши натижасида пиёда М.П.Greyсни уриб юбориб, унинг ўлимига сабаб бўлган йўл-транспорт ҳодисасини содир қилган.

Суд судланувчи Шуҳрат Жабборовнинг айбига тўлиқ иқрорлигини, қилмишидан чин кўнгилдан пушаймонлигини баён қилиб, ўзига нисбатан қонуний енгиллик беришни сўраганлигини инобатга олиб, шунингдек Ўзбекистон Республикаси Олий Мажлис Сенатининг 2016 йил 12 октябрдаги «Амнистия тўғрисида»ги Қарорининг таъсир доирасига тушганли ва Инсонпарварлик принципига амал қилиб, Жаббаров Шухратга ЖКнинг 266-моддаси 2-қисми билан 2 (икки) йил муддатга транспорт воситаларини бошқариш ҳуқуқидан маҳрум қилинган ҳолда 4 (тўрт) йил муддатга озодликдан маҳрум қилиш жазоси тайинлади.

Шуҳрат Жабборов Ўзбекистон Республикаси Олий Мажлис Сенатининг 2016 йил 12 октябрдаги «Ўзбекистон Республикаси Конституцияси қабул қилинганлигининг йигирма тўрт йиллиги муносабати билан Амнистия тўғрисида»ги Қарорининг 2-банди татбиқ этилиб, тайинланган асосий жазодан озод қилинди.