Ижтимоий тармоқларда «Уй эгалари уйини бузишга келганларни тошбўрон қилди ва бузилишларга танаси билан тўсқинлик қилди» деган ном билан тарқатилган видеолавҳа Андижон вилояти ИИБ томонидан ўрганиб чиқилди. Бу ҳақда ИИВ матбуот хизмати маълум қилди.
Фуқаролик ишлари бўйича Избоскан туманлараро судининг 2017 йил 21 декабрь куни даъвогар Избоскан тумани, «Узункўча» маҳалла фуқаролари йиғини, Мадраса кўчаси, 36-уйда яшовчи Каримова Maxсудахонни жавобгар, шу маҳалладаги М.Болтабоев кўчаси, 20-уйда яшовчи фуқаро Маматожиев Обиджон ва бошқаларга нисбатан даъво аризаси бўйича юритилган фуқаролик иши кўриб чиқилган.
Суднинг 2018 йил 11 январь кунги ҳал қилув қарори ва шу кунги ижро варақасига кўра, низоли Избоскан тумани «Узункўча» маҳалла фуқаролари йиғини, Ойдинҳаёт (собиқ М.Болтабоев) кўчасида 1.389 квадрат метр ер майдонида жойлашган 20-уйга жавобгар Маматожиев Обиджон томонидан ўзбошимчалик билан қурилган уй-жой, айвон ва бостирма қурилмалари жавобгар ҳисобидан мажбурий тартибда ёки даъвогар томонидан буздирилиши белгиланган.
Мажбурий ижро бюроси Избоскан тумани бўлимининг 2019 йил 2 май кунги ижрони амалга ошириш ҳақидаги 9899-сонли хатига асосан, ФИБ Избоскан туманлараро судининг 2018 йил 11 январь кунги ҳал қилув қарори ва ижро варақаси ижросини таъминлаш мақсадида 2019 йил 4 май куни «Узункўча» маҳалласида жойлашган ноқонуний қурилмани буздириш тайинланган.
Суд ижро варақаси ижросини таъминлашга масъул бўлган суд ижрочилари ва тадбирга жалб этилган масъуллар 2019 йил 4 май куни соат 11.00да Ойдинҳаёт кўчасидаги ноқонуний қурилган хонадонда яшовчи Маматожиев Обиджоннинг яшаш хонадонига келган. Фуқарога суднинг ҳал қилув қарори ва ижро варақаси ўқиб эшиттирилиб, ижросини таъминлаш учун хонадонни бўшатиб қўйишлари тўғрисида тушунтирилишига қарамасдан, жавобгар ва унинг турмуш ўртоғи Маматожиева Барнохон суд қарори ижросини амалга оширилишига фаол қаршилик кўрсатган.
Жамоатчилик олдида бақир-чақир қилиб, уятли сўзлар билан тадбирга жалб этилган масъулларни ҳақорат қилишган ва қўлига тош олиб, ноқонуний қурилган уйни бузишга жалб этилган махсус трактор ойналарига қарата отган. Суд ижрочилари ва туман ИИБ ходимларининг қонуний талабларига бўйсунмаганликлари учун профилактика инспектори лейтенант У.Қурбонов томонидан хонадон эгаси О.Маматожиевга қўл кишани солиниб, бу ҳақда туман ИИБ бошлиғи номига билдирги оркали ахборот берилган.
Тадбир давомида фуқаро О.Маматожиев ва унинг турмуш ўртоғи Б.Маматожиева томонидан суд ижро варақаси ижросини таъминлашга тўсқинлик қилганликлари ва суд ижрочилари ҳамда ИИБ ходимларининг қонуний талабларига бўйсунмаганлик ҳолатлари бўйича суриштирув ҳужжатлари олиб борилди. Тўпланган ҳужжатлар мазмунан кўриб чиқишлик учун туман прокуратурасига юборилди.
Юқорида қайд этиб ўтилган жараён О.Маматожиевнинг қўшнилари Холдарова Феруза ва Содиқова Нозима мобил телефони ёрдамида видеотасвирга олганлиги аниқланди.
Тадбир давомида ушбу ҳолатни видеотасвирга олган Ойдинҳаёт кўчасида яшовчи, Андижон руҳий-асаб касалликлари диспансерида ҳамшира вазифасида ишловчи Холдарова Ферузахон ўзини Мажбурий ижро бюроси ходимлари уриб тан жароҳати етказганлигини маълум қилиб, туман тиббиёт бирлашмасига мурожаат қилган.
Мазкур ҳолат туман ИИБда 2019 йил 4 май куни рўйхатдан ўтказилиб, ҳозирда туман прокуратураси терговчиси А.Абдумаликов томонидан Маматожиев Обиджон ва унинг турмуш ўртоғи Маматожиева Барнохонга нисбатан Маъмурий жавобгарлик тўғрисидаги кодекснинг 183 ва 194-моддалари билан ҳужжатлар расмийлаштирилиб, 2019 йил 10 май куни суд муҳокамасига тақдим қилинган.
Изоҳ (0)