Nokia компанияси айрим телеком-қурилмаларининг интеллектуал мулк ҳуқуқлари ва манба кодларини Россиянинг «Ростелеком» компанияси билан ташкил этилган «РТК-Тармоқ технологиялари» қўшма корхонасига беради. Бу ҳақда компанияга асосланиб, «РБК» хабар берди.
Россия давлат оператори қўшма корхонанинг 51 фоизига эгалик қилишини 2018 йилда Петербургда ўтказилган халқаро иқтисодий форум доирасида маълум қилганди. Қўшма корхона фаолияти тармоқ алоқалари учун дастур ва қурилмалар ишлаб чиқаришга ихтисослашган. Битим доирасида Nokia 2019—2022 йиллар давомида 10 миллиард рубль маблағ тикиши керак. Ушбу пуллар «РТК-Тармоқ технологиялари» маҳсулотларини ишлаб чиқаришга йўналтирилади.
Интеллектуал мулк ҳуқуқи Россия компаниясининг айнан қайси маҳсулотларига берилишига ойдинлик киритилмаган. Ҳужжатларда кўрсатилишича, кейинчалик ишлаб чиқариш Россияда маҳаллийлаштирилади.
Бирор бир лойиҳага интеллекутал мулк ҳуқуқини тақдим этган компания ушбу технологиянинг тўлақонли эгасига айланади: барча патентлар, ноу-хаулар ва манба кодларига эгалик қилади.
«РТК-Тармоқ технологиялари» ўз қурилмаларини «Ростелеком»га бозор нархидан 4—5 фоиз арзонга сотишни режа қилган. Натижада компания 2019 йилда «Ростелеком»га 67,6 миллион евролик, 2022 йилга эса 397 миллион евролик маҳсулот сотади. 2019 йилдаги даромади 97,6 миллион еврога тенг бўлса, 2022 йилда 581 миллион еврони ташкил этади. Шу билан бирга «РТК-Тармоқ технологиялари»ни ривожлантиришга кетадиган харажатлар миқдори 500 миллион евродан ортади.
Изоҳ (0)