«Шереметево» аэропортида самолётнинг фавқулодда қўниши оқибатида ҳалок бўлганлар сони 41 кишига етгани айтилмоқда. Шу муносабат билан Мурманск вилоятида уч кунлик мотам эълон қилинган, деб хабар беради «Вести.ru».
SSJ-100 лайнери фавқулодда қўнишни амалга ошириш вақтида учиш-қўниш йўлагига тумшуғи билан урилган ва ёниб кетган. Самолёт ичида бўлган 78 нафар инсоннинг ярмидан кўпи ҳалок бўлган.
«Самолёт бортида бўлган 78 кишидан 37 нафари омон қолди», — дейди тергов қўмитаси вакили.
Ҳалок бўлганлар ҳақидаги маълумотлар ўзгариб турибди. Қутқарувчилар ёнғин сабаб ҳаво кемасининг дум қисмида жойлашган йўловчиларни қутқаришга қийналган.
Барча жароҳат олганлар энг яқин шифохоналарга жойлаштирилган. Аксарият йўловчилар газдан заҳарланиш ва куйиш жароҳатини олган. Шифохонадаги 6 нафар йўловчидан уч нафарининг аҳволи оғир эканлиги айтилмоқда.
Айни вақтда мутахассислар ҳалокат сабабини аниқлашга уринмоқда. «Ространснадзор» ҳамда прокуратура текширувларни бошлаб юборган. Самолёт ноқулай об-ҳаво шароити сабаб иккинчи уринишдагина аэропортга қўнишга муваффақ бўлган. Қўниш вақтида унинг тиркамалари синган, двигатели ёниб кетган. «Москва—Мурманск» йўналишида қатнайдиган ушбу рейс ҳавода 28 дақиқа парвоз қилган.
Маълумотларга кўра, мудхиш ҳодиса сабаб «Аэрофлот» парвозлари жадвалига ўзгартириш киритлган.
Изоҳ (0)