Россиялик депутат SSJ-100 самолёт билан боғлиқ ҳодиса сабаби аниқланмагунча шу турдаги барча самолётларнинг парвозини тўхтатиб туришни талаб қилди

Россия давлат думаси депутати Михаил Романов «Росавиация» раҳбари Александр Нерадкодан SSJ 100 самолётининг қўнишига боғлиқ масалани кўриб чиқишни талаб қилди, деб хабар беради «Газета.ru». 5 май куни «Шереметево» аэропортида SSJ-100 йўловчи самолёти қўнишни амалга ошираётган вақтда ёниб кетган эди.

Романовнинг сўзларига кўра, «Шереметево»да содир бўлган нохуш ҳодисанинг сабаблари аниқланмагунча шу турдаги барча самолётларнинг парвози тўхтатиб турилишини талаб қилмоқда.

Унинг қўшимча қилишича, мазкур самолёт моделидан Петербург аҳолиси ҳам фойдаланади, шу сабабли петербургликлар ҳамда Россиянинг бошқа шаҳарлари аҳолиси ўртасида катта норозилик юзага келган.

«Ўзим тез-тез Санкт-Петербург — Москва, Москва — Санкт-Петербург йўналиши бўйича учиб тураман», — дейди Романов.

Москвадаги «Шереметево» аэропортида Мурманскка кетаётган SSJ-100 йўловчи самолёти авариявий қўнишни амалга ошираётган вақтда ёниб кетиши оқибатида 13 киши ҳалок бўлгани айтилмоқда.