Фарғона вилоятида вояга етмаган қўшниси О.Валиевга укол қилиш натижасида унинг ўлимига сабаб бўлган тиббиёт ходими Фотимахон Холматовага нисбатан суд ҳукми ўқилди. Бу ҳақда Жиноят ишлари бўйича Фарғона вилояти Ўзбекистон тумани суди раиси Ойбек Мирсодиқов «Дарё»га маълум қилди.
Маълум бўлишича, марҳум О.Валиев холасининг уйида беҳи артаётиб, чап қўл кафтини кесиб олган. Шифохонада унга керакли муолажалар қилиниб, қўли тикиб қўйилган. Шундан сўнг, О.Валиевнинг қўлини онаси уй шароитида ўзи муолажа қилиб, тахминан 7—8 кундан кейин тикилган тан жароҳатидаги ипни олиб ташлаган.
Иплар олиб ташланиб, жароҳат қонаганидан сўнг, она боланинг қўлини яна боғлаб қўйиб, дорихонага борган. У ердан жароҳатни даволаш учун бирор-бир дори беришни сўраганида, сотувчи шифокорга учрашни маслаҳат берган. Она ўғлини «Ортопедия» хусусий клиникасига олиб борганида, шифокор боланинг қўлидаги жароҳат газак олгани учун дори қўйиб, боғлаб қўйган.
Шундан сўнг бола жароҳати юзасидан икки кун давомида шифокор назоратида бўлиши лозимлигини уқтириб, «Сефтриаксон» дори воситасини ёзиб берган, дорини шифохонада қабул қилиш кераклигини тушунтирган. Лекин она шифохонада муолажага навбат бўлганлиги учун кутиб ўтирмай, маҳалласида яшовчи 77-сонли қишлоқ оилавий поликлиникасида статистик маълумотларни олиш ва жамлаб борувчи статист Фотимахон Холматованинг уйига борган.
Ундан ўғлига шифокор ёзиб берган дорини укол қилиб қўйишни сўраганида, Фотимахон Холматова «Цефтриаксон» ва «Лидокаин» дори воситаларини бирга қўллаб бўлмаслигини, «Цефтриаксон»га яна «Новокаин» эритмаси ҳам кераклигини айтган. Эртасига Фотимахон Холматова олиб келинган «Новокаин» эритмаси кичкина эканлигини айтган. Шунда О.Валиевнинг онаси «Цефтриаксон» дори воситасини «Лидокаин» эритмаси билан ҳам қилиб қўяверишни илтимос қилаверган.
Оқибатда Фотимахон Холматова рози бўлиб, «Цефтриаксон»ни «Лидокаин» эритмасига қўшиб, намуна сифатида О.Валиевнинг думбасига укол қилган. Шундан сўнг О.Валиевнинг кўнгли айниб қайт қила бошлаган. Фотимахон Холматова уколни тўхтатиб, тез ёрдам чақирган. Аммо О.Валиев йўлда вафот этган.
Судда О.Валиевнинг онаси ўғлининг вафоти юзасидан шифокорлар ва қўшниси Фотимахон Холматовага нисбатан ҳеч қандай даъвоси йўқлигини, укол унинг илтимосига кўра қилинганлиги, соғлиғига бееътибор бўлгани боис ўғлининг ўлимида ўзини ҳам айбдор ҳисоблаётганини, судланувчи Фотимахон Холматовага нисбатан енгиллик беришни, имкони бўлса жазо тайинламасликни сўраган.
Суд Фотимахон Холматованинг айбига тўлиқ иқрорлиги, мансабдор шахс эмаслиги, оилада ягона боқувчи эканлиги, асосий касби тиббиёт соҳаси билан боғлиқлиги, бошқа касби йўқлиги ва оилавий шароити оғирлигини инобатга олиб, унга нисбатан Жиноят Кодексининг 45-моддасида кўрсатилган муайян ҳуқуқдан маҳрум қилиш тарзидаги қўшимча жазони тайинламасликни лозим топди.
Судда Фотимахон Холматова Жиноят Кодексининг 116-моддаси 3-қисми (эҳтиётсизлик орқасида одам ўлишига сабаб бўлган касб юзасидан ўз вазифаларини лозим даражада бажармаслик) билан айбли деб топилиб, 57-моддасини (енгилроқ жазо тайинлаш) қўллаб, ҳар ойлик иш ҳақининг 20 фоизини давлат даромадига ушлаб қолган ҳолда 2 йил муддатга ахлоқ тузатиш ишлари жазоси тайинланди.
Изоҳ (0)