Май ойидаги дам олиш кунлари, Россия ташқи ишлар вазирининг Ўзбекистонга ташрифи, Рамазон ойи тўғрисидаги Президент қарори ва куннинг бошқа хабарлари

2 майнинг эътиборга молик янгиликлари — «Дарё» дайжестида.

Ўзбекистонликлар май ойида неча кун дам олади?

Май ойида дам олиш кунлари бўйича ҳеч қандай ўзига хослик йўқ. Ҳафтасига беш кун ишлайдиганлар одатдагидек шанба-якшанба кунлари, олти кун ишлайдиганлар эса якшанба куни дам олади.

***

Россия Федерацияси Ташқи ишлар вазири Сергей Лавров икки томонлама музокаралар олиб бориш ва Гиёҳванд моддаларни назорат қилиш соҳасида минтақавий ҳамкорлик бўйича ўзаро англашув Меморандуми иштирокчи давлатларининг 11-учрашувида қатнашиш учун Тошкент шаҳрига келди.

У дастлаб Ўзбекистон Республикаси Ташқи ишлар вазири Абдулазиз Комилов билан учрашди. Сўнг Ўзбекистон Республикаси Президенти Шавкат Мирзиёев томонидан қабул қилинди.

***

Шавкат Мирзиёев «Муборак Рамазон ойини муносиб нишонлаш тўғрисида»ги қарорни имзолади.

Ҳужжатда қайд этилишича, жорий йил Рамазон ойининг бошланиши 6 май кунига тўғри келади. Ўзбекистон мусулмонлари идорасининг бу ҳақдаги ахбороти маълумот учун қабул қилинган.

***

Андижонда 5 ёшли қизчани зўрлаб, кейин уни ўлдирган педофил 19 йилга қамалди.

Суд тиббий экспертизасига кўра, С.К. ҳушини йўқотган пайтда унинг ҳаётини сақлаб қолиш мумкин бўлган, лекин М.И. жинояти ошкор бўлишидан қўрқиб қизни бўғиб ўлдирган.

***

Тошкентда лифтда қамалиб қолган болалар қутқарилди.

30 апрель куни Тошкент шаҳри «Новза» метро бекати ёнида жойлашган кўпқаватли уйларнинг бирида 4 нафар бола лифтга қамалиб қолган.

Тошкент шаҳар фавқулодда вазиятлар бошқармаси вакиллари 6 дақиқада воқеа жойига етиб боришган ва болаларга керакли ёрдамни кўрсатиб, уларни қутқариб олишган.