30 апрель куни Жиззах вилояти Зомин тумани «Бирлик» маҳалла фуқаролар йиғинида яшаган Сардор Баҳодиров бахтсиз ҳодиса туфайли ҳаётдан кўз юмди, деб хабар беради ЎзА.
Сардор Баҳодиров Гулистон шаҳри ҳудудидан оқиб ўтувчи «Дўстлик» канали қирғоқ бўйлаб кетаётганида чўкаётган қизга кўзи тушади.У чўкаётган қизни қутқариш мақсадида зудлик билан сувга тушади ва унинг ҳаётини сақлаб қолади. Аммо сув совуқлигидан Сардорнинг томирлари тортишиб қолиб, ўзи сув тагига ғарқ бўлади.
«Экспертиза хулосасига кўра, 1999 йил Зомин туманида туғилган Сардор Баҳодиров ‘чўкиш оқибатида нафас йўлларининг сув билан беркилишидан юзага келган механик асфиксия’ натижасида вафот этганлиги маълум бўлди. Ҳолат юзасидан Гулистон шахар прокуратураси топшириғига асосан зудлик билан суриштирув ҳаракатлари бошлаб юборилди», – дейди Гулистон шаҳар ИИБ бошлиғи, полковник З.Қаюмов.
Қутқариб қолинган қиз вояга етмаган 2005 йилда туғилган Гулистон шаҳрида яшовчи 8-мактабнинг 8 -синф ўқувчиси Мадина Муҳиддинова экани аниқланди.
Жабрланувчи Республика шошилинч тиббий ёрдам илмий маркази вилоят филиали жонлантириш бўлимига етказилди. Қизнинг жисмоний ҳолати нормаллашмоқда. Қизнинг нима сабабдан сувга тушганлиги сабаблари прокуратура ходимлари томонидан аниқланмоқда.
«Бу бахтсиз ҳодиса – шаҳар ҳудудидан оқиб ўтувчи ‘Дўстлик’ каналида шу ҳудуднинг ўзида жорий йилнинг биргина апрель ойидаги бу иккинчисидир. Шаҳар маъмурлари бу каби фожиаларнинг олдини олиш мақсадида зудлик билан зарур чора-тадбирлар ишлаб чиқмаса, ҳаво ҳарорати кўтарилган сари бундай бахтсиз ҳодисаларнинг такрорланмаслигига ҳеч ким кафолат бера олмайди», — дейилади хабарда.
Изоҳ (0)