Япония императори Акихито истеъфога чиқаётганини эълон қилиб, уни мамлакат рамзи сифатида тан олиб, қўллаб-қувватлаган халқига миннатдорчилик билдирди. Бу ҳақда «Корреспондент.net» хабар берди.
85 ёшли монарх бу ҳақида унинг хайрлашув маросимини эфирга узатаётган миллий телеканаллар орқали халқига мурожаат қилиб айтган.
Маросим император саройида бўлиб ўтган. Унда 300 киши, жумладан, император хоним Митико ва императорнинг оила аъзолари, бош вазир Синдзо Абэ ва маҳкама аъзолари, парламентнинг иккала палатаси раислари, Олий суд судьяси, маҳаллий бошқарув органлари вакиллари қатнашган.
«Мени мамлакат рамзи деб олган ва қўллаб-қувватлаган халқимга чин дилдан миннатдорчилик билдираман. Ўз императорлик вазифамни халқимга муҳаббат ва ишонч ҳисси билан бажарганимдан жуда ҳам бахтлиман», —дейди Акихито.
Маросимда қатнашган мамлакат бош вазири Синдзо Абэ ҳам ўз ўрнида императорга халқи учун жон куйдириб ишлагани учун миннатдорчилик билдирди.
«Император, белгиланган қонунларимизга кўра, бугун истеъфога чиқди», – дейди Абэ.
Эслатиб ўтамиз, Ўзбекистон Президенти Шавкат Мирзиёев Япония императори Акихитога мактуб йўллагани ҳақида хабар берган эдик.
Ўзбекистон раҳбари ўз мактубида император Акихитонинг «Хейсей» деб ном олган ҳукмронлик даври бутун дунёда улкан муваффақиятлар — Япония мустаҳкам тинчлик ва ҳар томонлама тараққиётга эришган, иқтисодий жиҳатдан етакчи давлатлар қаторига кирган, глобал жараёнлардаги нуфузи ва роли салмоқли даражада юксалган давр бўлганини таъкидлаган.
Шавкат Мирзиёев Япония императорига Ўзбекистон билан Япония ўртасида дўстлик, ҳурмат ва ишонч асосида ўзаро манфаатли ва кўп қиррали ҳамкорликни ривожлантиришга қаратган шахсий эътибори ва кўмаги учун самимий миннатдорлик билдирган.
Изоҳ (0)