Грузия собиқ президенти Михаил Саакашвили Россия президентининг баёнотига муносабат билдирди, деб хабар берди «MK.ru».
Владимир Путин ўз баёнотида Киевнинг янги ҳукуматидан Саакашвилига Украина фуқаролигини қайтаришни сўраган эди. Россия етакчиси Саакашвилининг фуқароликдан маҳрум этилиши ва янги ватанидан қувғин қилинишини ноқонуний деб атаган.
Грузиялик сиёсатчи бунга жавобан ижтимоий тармоқдаги саҳифасида ёзишича, Путин 2017 йилнинг якунида Украина президенти Порошенкодан Саакашвилини мамлакатдан чиқариб юборишни «баралла талаб қилган» ва Порошенко унинг айтганини қилган. У, шунингдек, Путин 2014 йилги Украина президенти инаугурациясига грузиялик собиқ ҳамкасбини чақирмасликни сўраганини ҳам «аниқ билади».
Бундан ташқари, Саакашвилининг таъкидлашича, Россия президенти Туркия, Арманистон ва Озарбайжондан қувғинга учраган грузияликни қабул қилмасликни талаб қилган.
«Путин — яп-янги тролл», — деб ёзди Саакашвили. «Биз украиналиклар билан ўзимиз келишиб оламиз!», — дея қўшимча қилган грузиялик сиёсатчи.
Украина президенти этиб сайланган Владимир Зеленский сайловолди кампанияси давомида Михаил Саакашвилини яхши маслаҳатчи деб ҳисоблагани учун унга Украина фуқаролигини қайтариш ва уни иш билан таъминлашга тайёр эканлигига ишора қилган эди.
Изоҳ (0)