Миллий гвардиянинг Сурхондарё бўлими ҳарбийлари учун ҳар ҳафтанинг чоршанбаси «китобхонлик куни» деб белгиланди

Ўзбекистон Республикаси Миллий гвардияси Сурхондарё вилоят бўлинмаси ҳарбий хизматчилари Термиз шаҳридаги Адиб Собир Термизий номидаги вилоят ахборот-кутубхона марказида китобхонларга яратилган шароитлар билан танишди. Кутубхонага аъзо бўлди, деб ёзади ЎзА.

«Президентимиз томонидан илгари сурилган 5 та муҳим ташаббуснинг асосий бандларидан бири – ёшларни маънавий баркамол ва китобхон этиб тарбиялашга алоҳида эътибор қаратмоқдамиз. Шу мақсадда ҳар ҳафтанинг чоршанбаси китобхонлик куни, деб белгиланди. Замонавий ахборот-кутубхона маркази билан яқин алоқани йўлга қўйганимиз ҳарбий хизматчилар ва муддатли ҳарбий хизмат бурчини бажараётган аскарларимизнинг китоб мутолаасига эҳтиёжини янада кенгроқ қондиришга кўмаклашади. Уларнинг зиё масканига келиб-кетиши учун махсус транспорт воситаси ҳам ажратдик», – дейди Ўзбекистон Республикаси Миллий гвардияси Сурхондарё вилоят бўлинмаси подполковниги Ф.Усмонхўжаев.

Давлат раҳбари илгари сурган ташаббусни ҳаётга кенг татбиқ этишга йўналтирилган бу каби эзгу ишлар ёш ҳарбийларнинг Ватанга муҳаббат, қасамёдига садоқат, миллий ва умумбашарий қадриятларга ҳурмат туйғусини янада мустаҳкамлаб, юрт осойишталиги, хонадонларимиз ободлиги ва тўкин турмушни таъминлашда муҳим аҳамият касб этади. Ёш ҳарбийларнинг бўш вақтини фойдали, мазмунли ўтказиш ҳамда китобхонлик маданиятини юксалтиришга хизмат қилади.

«Бу кутубхона бизга манзур бўлди. Салобатли ва кўркам бино бой китоб фондига эга экан. Замонавий усулда жиҳозланган ўқув заллари, интернетга уланган ресурс хоналаридан унумли фойдаланиш учун барча шароит бор. Эндиликда биз ҳар ҳафтанинг чоршанба куни бу масканга келиб, ўзимиз қизиққан китобларни мириқиб ўқиймиз. Истасак, маълум муддатга ўзимиз билан олиб кетамиз. Тарихий, ҳуқуқий, бадиий ва бошқа китобларни мутолаа қилиб, билимимизни, онгу тафаккуримизни бойитамиз», – дейди Хоразм вилоятидан муддатли ҳарбий хизматга чақирилган Оғабек Матёқубов.

Ёш ҳарбийлар ахборот-кутубхона марказидан ўзлари севган китобларни танлаб, мутолаа қилишни бошлади. Электрон китоблардан фойдаланиш кўникмасини мустаҳкамлади.

Вилоят марказида янгидан қурилиб, ўтган йили фойдаланишга топширилган Адиб Собир Термизий номидаги Сурхондарё вилоят ахборот-кутубхона маркази 300 минг китоб ва 5 мингдан ортиқ электрон китоб фондига эга. Маърифат маркази бир йилда ўртача 100 мингдан зиёд китобхонга хизмат кўрсатади. Салобатли маърифат масканида Book-кафе ва «Китоб олами» савдо дўкони, Wi-Fi ҳудуди фаолият юритмоқда.