Андижон вилоят телерадиокомпаниясида жиноят, фуқаролик, маъмурий ва иқтисодий ишлар бўйича вилоят судлари раислари иштирокида ўтказилган навбатдаги брифингда ўтган йил давомида амалга оширилган ишлар таҳлил этилди. Бу ҳақда «Дарё» мухбири хабар бермоқда.
Брифингда қатнашган фуқаролик ишлари бўйича Андижон вилоят суди раиси Воҳиджон Назаровнинг маълум қилишича, жорий йилнинг биринчи чораги мобайнида 721 нафар шахсга нисбатан 547 та жиноят иши кўриб чиқилган ва тамомланган. Шундан 570 нафар шахсга нисбатан 411 та жиноят иши бўйича айблов ҳукми чиқарилган. 150 нафар шахсга нисбатан 135 та жиноят иши тугатилган. 1 нафар шахсга нисбатан иш бўйича тиббий йўсиндаги мажбурлов чораси қўлланилган. Вилоятда умумий жиноятлар сони 23,9 фоизга, жумладан, қонунга хилоф равишда чет элга чиқиш ёки Ўзбекистон Республикасига кириш 1,5, босқинчилик жинояти 2 бараварга, фирибгарлик жинояти 26,7, ўғрилик жинояти 20, транспорт воситалари ҳаракати ёки улардан фойдаланиш хавфсизлиги қоидаларини бузиш 13,5, қасддан баданга оғир шикаст етказиш жинояти 40 фоизга камайган.
Вилоят, туман (шаҳар) Маъмурий судлари томонидан эса 5 726 нафар шахсга нисбатан 4 769 та маъмурий ҳуқуқбузарлик тўғрисидаги ишлар кўриб чиқилиб, шундан 3 546 нафар шахсга нисбатан 3 035 та иш бўйича жазолар қўлланилган (63,6%) ва 2 180 нафар шахсга нисбатан 1 734 та иш ҳаракатдан тугатилган (36,3%). Жумладан, 3 244 шахсга нисбатан жарима (91,4%), 66 нафар шахсга нисбатан махсус ҳуқуқдан (транспорт воситасини бошқариш ҳуқуқидан) маҳрум қилиш (1,8%), 223 нафар шахсга нисбатан маъмурий қамоққа олиш (6,2%), 10 нафар шахсга нисбатан Ўзбекистон Республикаси ҳудудидан чиқариб юбориш жазоси (0,2%), 3 нафар шахсга нисбатан ашёни ҳақини тўлаш шарти билан олиб қўйиш жазолари қўлланилган. Маъмурий жазо қўлланилган шахслардан 472 нафари аёллар (13,3%), 14 нафари вояга етмаганлар (0,3%), 179 нафари 60 ёшдан ошганлар (5%), 118 нафари чет эл фуқаролари (3,3%), 30 нафари фуқаролиги бўлмаган шахслар (0,8%), 138 нафари тадбиркорлик субъектлари (3,8%)ни ташкил қилган. 2019 йилнинг 1-чораги давомида кўриб тамомланган ишларнинг 3 504 таси, яъни 73,5 фоизи сайёр суд мажлисида кўрилган.
Вилоят иқтисодий судларига 2019 йил 1-биринчи чорагида 5 414 та ариза ва даъво аризаси келиб тушган. Аризалар сони 2018 йилнинг биринчи чорагига нисбатан 7 358 тага ёки 42,4 фоизга камайган. Вилоят иқтисодий судлари томонидан жами 3 996 та иш кўрилиб, даъвогарлар фойдасига 99 миллиард 993 миллион сўм ундириш ҳақида суд қарорлари қабул қилинди. Вилоят иқтисодий судлар томонидан жами 2 минг 722 та иқтисодий иш сайёр суд мажлисларида кўрилган бўлиб, бу жами кўрилган ишларнинг 68,1 фоизини ташкил этди.
Изоҳ (0)