24 апрелнинг эътиборга молик янгиликлари — «Дарё» дайжестида.
Ўзбекистон Республикаси Президенти Шавкат Мирзиёев амалий ташриф билан Пекинга келди.
Давлат раҳбари у ерда «Бир макон, бир йўл» иккинчи халқаро форумида иштирок этади.
Хитой Халқ Республикаси Раиси Си Цзиньпин ва Бутунхитой халқ вакиллари кенгаши Доимий қўмитаси Раиси Ли Чжаншу билан учрашувлар ўтказади. Шунингдек, форумда иштирок этадиган хорижий давлатлар делегациялари ва халқаро ташкилотлар раҳбарлари билан ҳам музокаралар ўтказилиши режалаштирилган.
***
Тошкент шаҳрида кузатилаётган кучли ёмғир натижасида эрта тонгдан кўчаларни сув босди.
Самарқанд шаҳрининг марказий кўчаларидан бирида сув тошқини кузатилди.
Ёғингарчилик туфайли Самарқанд шаҳрининг Даҳбет кўчасидаги уйлардан бирининг деворининг бир қисми қулаб тушган.
Самарқанд вилояти Пайариқ туманида келаётган сел эса катта жарлик ҳосил қилди.
Шунингдек, кучли ёмғир Ургутда ярим миллион аҳолини чироқсиз қолдирди.
Тошкент кўчаларининг бирида ёмғир сабаб дарахт автомобиллар устига йиқилди.
***
Ким Чен Ин Владимир Путин билан музокаралар ўтказиш учун Россияга келди.
У эртага, 25 апрель куни Владимир Путин билан учрашади. Президентлар икки томонлама муносабатлар ва ядровий қуролсизлантириш масалаларини муҳокама қилади.
***
Ўзбекистонда Иккинчи жаҳон уруши қатнашчиларига 7,5 млн сўмдан пул мукофоти берилади.
9 май умумхалқ байрами – Хотира ва Қадрлаш куни ўтказилиши, шунингдек, фашизм устидан қозонилган ғалабанинг 74 йиллиги нишонланиши муносабати билан уруш қатнашчилари ва ногиронлари моддий рағбатлантирилади.
***
Ўзбекистонда Иккинчи жаҳон уруши фахрийлари туғилиб ўсган кўчаларга уларнинг номларини бериш бошланади.
Бу «Хотира ва қадрлаш кунига тайёргарлик кўриш ва уни ўтказиш чора-тадбирлари тўғрисида»ги Президент қарорида кўзда тутилган.
Изоҳ (0)