Флорида университети олимлари иммунитет тизимини кучайтириб, саратонга қарши курашишга ёрдам берадиган экспериментал мРНК вакцинасини ишлаб чиқди. Бу ҳақда New Atlas нашри хабар берди.
Янги вакцина кимётерапия, жарроҳлик аралашуви ва нур терапияси каби оғир муолажаларга эҳтиёжни камайтириши мумкин. Олимлар коронавирус вакцинасининг вазифасига ўхшаш “универсал” препарат яратган. У иммун ҳужайраларга буйруқ бериб, саратон ўсимталарига биргаликда ҳужум қилишни фаоллаштиради.
Биз саратонни даволаш учун эмас, балки иммунитетни кучайтириш мақсадида ишлаб чиқилган вакцинадан фойдаланиб, саратонга қарши кучли реакцияни юзага келтира олишимизни аниқладик. Шу тариқа, вакцина онкологик беморлар орасида кенг қўлланиши учун сезиларли салоҳиятга эга, эҳтимол, ҳатто саратонга қарши тайёр вакцина яратиш учун ҳам, дейди тадқиқот ҳаммуаллифи Дуэйн Митчелл.
Вакцина лаборатория шароитида сичқонлар устида синовдан ўтказилган. Натижада вакцина кенг тарқалган иммунотерапевтик дори — PD-1 ингибитори билан биргаликда қўлланганда, у меланома билан оғриган сичқонларда дориларга чидамли ўсимталарни йўқ қилган. Мия саратони, суяк саратони ва тери саратонининг бошқа турлари бўйича эса вакцина ҳатто қўшимча дори воситаларисиз ҳам ўз самарадорлигини кўрсатган.
Ҳозирда ушбу вакцина клиник олди синов босқичида бўлиб, олимлар инсонлар устида клиник синовларни бошлашга тайёргарлик кўрмоқда.
Изоҳ (0)