Олий суд раиси ўринбосарлари Қорақалпоғистон ва Самарқандда сайёр қабуллар ўтказди

Ўзбекистон Республикаси Олий суди раиси ўринбосари Б.Исоқов ҳамда Олий суди судьялари 23 апрель куни Қорақалпоғистон Республикаси Қўнғирот туманида сайёр қабуллар ўтказди. Бу ҳақда Олий суд матбуот хизмати хабар берди.

Сайёр қабулларда аҳолининг жиноий, фуқаролик, маъмурий ва иқтисодий судларга оид мурожаатлари тингланди.Қўнғиротдаги қабул давомида 56 нафар фуқаронинг мурожаати тингланиб, уй-жой, мол-мулк, оммавий ҳуқуқий муносабатлар, маъмурий ҳуқуқбузарликлар билан боғлиқ масалалар юзасидан фуқароларнинг арзлари эшитилди.

12 нафар фуқаронинг аризалари назорат тартибида қабул қилинди. 44 нафар фуқарога судга шикоят қилиш тартиби ва муддатлари юзасидан ҳуқуқий тушунтиришлар берилди.

Шунингдек, сайёр қабул жараёнида жазони ўтаётган маҳкумларга нисбатан Жиноят кодексининг 74-моддасига асосан жазони енгилроғи билан алмаштириш бўйича илтимосномалар кўриб чиқилди ва 19 нафар шахс жазони ўташ жойларидан озод қилинди.

Шунингдек, Олий суд раисининг ўринбосари Х.Ёдгоров ва Олий суд судьялари Самарқанд вилоятининг Пастдарғом ва Ургут туманида ташкил этилган сайёр қабулларда фуқароларнинг мурожаатларини ўрганди.

Сайёр қабулларда сайёр суд мажлислари ҳам ўтказилди.

Сайёр судларда 31 нафар маҳбус жазони ўташ жойидан муддатидан олдин озод қилиниб, оиласи бағрига қайтарилди. Шунингдек, аҳлоқ тузатиш ишлари, озодликни чеклаш ва синов муддатини ўтаётган 131 нафар маҳкум жазони ўташдан муддатидан олдин озод этилди. 2 нафар судланувчига доир иш апелляция ва кассация инстанцияларида кўрилиб, суд залида қамоқдан озод қилинди ҳамда 1 нафар судланувчи ЖКнинг 70-моддасига асосан тайинланган жазодан озод қилинди.

Сайёр қабулларда суд залидан озод бўлган ҳамда озодликдан маҳрум қилиш билан боғлиқ бўлмаган жазолар тайинланган 78 нафар фуқаро ва уларнинг оила аъзолари Президентимизга, Олий суд раҳбарларига ўз миннатдорликларини изҳор қилди.

Пастдарғом туманида ўтказилган сайёр қабулда 102 нафар фуқаро қабул қилинди. Улардан 11 нафарининг аризаси назорат тартибида, 17 нафарининг аризаси ўрганиб чиқиш учун қабул қилинди.

Мурожаатларнинг 72 таси судга оид, , 4 та шикоят судьянинг, Мажбурий ижро бюроси ходимларининг хатти-ҳаракатидан норозилик, 25 таси бошқа масалаларга тааллуқли бўлди.

Сайёр қабулларда 40 нафар фуқарога ҳуқуқий маслаҳат берилди, 25 та мурожаат жойида ҳал этилди. 37 та мурожаат ўрганиш учун қабул қилинди.

Ургут туманида ўтказилган сайёр қабулда 46 нафар фуқаронинг мурожаати эшитилди, улардан 10 та аризаси назорат тартибида кўриб чиқиш учун, 13 та ариза ўрганиб чиқиш учун қабул қилинди.

Мурожаатларнинг 35 таси судга оид, 1 та ҳокимият томонидан уй-жой берилмаётгани, 1 та оилани тиклаш, 4 та суд қарорларининг ижроси, 5 та бошқа масалаларга тааллуқли бўлди.

Сайёр қабулларда 18 нафар фуқарога ҳуқуқий маслаҳат берилди, 5 та мурожаат жойида ҳал этилди. 23 та мурожаат ўрганиш учун қабул қилинди.