Навоий вилоят Кармана туман ИИБ Миграция ва фуқароликни расмийлаштириш бўлинмаси бошлиғи лавозимида ишлаб келган И.Остонов (исм-фамилиялар ўзгартирилган) пора олишда айбланиб, жазоланди, дея хабар берди ЎзА.
Маълум бўлишича, у фуқароларни туман ҳудудида доимий ёки вақтинча рўйхатга киритиш ва рўйхатдан чиқариш ишларини ташкил этиш ҳамда назорат қилиш каби ваколатларидан бойлик орттириш йўлида фойдаланишга уринган.
Хусусан, ўз манфаатини кўзлаб, фуқаро Д.Жумаевни таниши бўлган Кармана тумани «Ёшлик» МФЙ посбони С.Комиловнинг уйига доимий рўйхатга қўйиш эвазига ундан 500 минг сўм миқдордаги пулларни пора тариқасида талаб қилган.
Д.Жумаевга доимий рўйхатга қўйиш учун тўланиши лозим бўлган 4.055 сўм миқдордаги тўловни ва шу кунгача ҳисобда турмасдан яшаб келганлиги сабабли 101.365 сўм миқдордаги маъмурий жарима тўлови ундирилмаслигини, фуқаролик паспортига олдинги сана билан рўйхатга қўйилганлиги ҳақида сохта маълумотлар ва ёзувларни киритиб беришни ваъда қилган.
2018 йил 28 декабрь куни ўтказилган тезкор тадбирда Д.Жумаевдан кимёвий ишлов берилган 500 минг сўм миқдоридаги пулларни олган вақтида ашёвий далиллар билан қўлга олинган.
2019 йилнинг 23 апрель куни жиноят ишлари бўйича Кармана туман суди И.Остоновни ЖКнинг 210-моддаси 1-қисми ва 209-моддасининг 1-қисми билан айбдор деб топган ва икки йил муддатга мансабдорлик лавозимларида ва ички ишлар органлари тизимида ишлаш ҳуқуқидан маҳрум қилиш, шунингдек, 2 йил-у 8 ой 5 кун муддатга озодликни чеклаш жазоси тайинланган.
Изоҳ (0)