22—23 апрель кунлари Наманган шаҳрида Подшоота дарёсининг ўзбек ва қирғиз қисмлари бўйича Кичик Ҳавза Кенгашининг иккинчи қўшма йиғилиши бўлиб ўтди. Бу ҳақда USAID’нинг Ўзбекистондаги ваколатхонаси матбуот хизмати хабар берди.
Йиғилиш Марказий Осиё минтақавий экология маркази (МОМЕМ) томонидан минтақадаги мамлакатлар ва Афғонистонда АҚШ халқаро тараққиёт агентлиги (USAID)нинг молиявий кўмаги остида амалга оширилаётган «Марказий Осиёда сув, таълим ва ҳамкорлик» (Smart Waters) лойиҳаси доирасида ўтказилди.
Лойиҳа фаолиятининг йўналишларидан бири дастлабки ҳудуд тариқасида Қирғизистон ва Ўзбекистон (Наманган вилояти) ҳудудларини қамраб олувчи Подшоота дарёси ҳавзаси билан боғлиқ.
«Умумий сув ресурсларига ошиб бораётган талаб ва уларнинг заҳиралари камайиши бошқарувни яхшилаш ва самарали фойдаланиш учун минтақавий ва давлатлараро яқиндан ҳамкорлик қилишни талаб этмоқда. Мамлакатлар сув ресурсларини самарали бошқариши учун улар ҳақидаги умум қабул қилинган ва аниқ бўлган маълумотларни олиш имконига эга бўлиши айниқса муҳим», — таъкидлади USAID Марказий Осиё тармоғининг Ўзбекистондаги ваколатхонаси директори Гери Роббинс.
Подшоота дарёсининг сув ресурслари бошқарувига ҳавзавий ёндошувни тарғиб этиш ҳамда сув ресурслари бошқаруви соҳасида икки томонлама ҳамкороикни мустаҳкамлаш мақсадида дарёнинг ҳар икки қисмида манфаатдор давлат ва нодавлат ташкилотлар вакилларидан иборат «кичик ҳавза кенгашлари» (КҲК) ташкил этилди.
Тадбирнинг биринчи кунида Подшоота дарёсининг Ўзбекистондаги қисми бўйича КҲК мажлислар залининг тантанали очилиш маросими ҳам бўлиб ўтди.
Кейин Янгиқўрғон туман ҳокимияти кўмаги остида ташкиллаштирилган демо-тур давомида иштирокчилар Эски ер сув омбори, Ғалаба-1 насос станцияси, Корея ва Исроил технологияларини қўллаган ҳолда помидор етишитиришга мўлжалланган иссиқхона, томчилаб суғориш тизими ўрнатилган йирик мевали боғ сингари объэктларга ташриф буюришди.
Бундай демо-тур мутахассислар ва Подшоота дарёсининг Қирғизистондаги қисми бўйича КҲК вакилларига сув ресурсларини бошқариш, томчилаб суғоришни жорий этиш ва сув тежовчи технологиялардан фойдаланаётган фермерлар учун ҳукумат томонидан кўрсатилаётган кўмак бўйича Ўзбекистон тажрибаси билан танишиш имконини берди.
«Smart Waters лойиҳаси туфайли бизнинг кичик ҳавза кенгашларимиз тузилди. Мана, икки йилдирки, Ўзбекистондаги ҳамкасбларимиз билан фаол равишда ҳамкорлик қилиб келмоқдамиз. Ҳозирда бизнинг вазифамиз – шу ҳамкорликни яхшилаш ва мустаҳкамлаш, сув ресурсларини бошқариш билан боғлиқ масалаларни муҳокама этиш, ўзаро фойдали, манфаатли қарорлар қабул қилишдан иборат. Мен Янгиқўрғон туман ҳокимига иккинчи КҲК учрашувини шу ерда – Подшоота дарёсининг Ўзбекистондаги қисмида ўтказиш имконияти ҳамда сув объэктлари ва фермер хўжаликларини намойиш этгани учун миннатдорчилик билдираман», — таъкидлади Подшоота дарёсининг Қирғизистондаги қисми бўйича КҲК раиси Масалбек Мирзамамитов.23 апрель куни ўтказилган мажлис давомида иштирокчилар Подшоота кичик трансчегаравий дарёси сув ресурсларини бошқариш бўйича долзарб масалаларни муҳокама этишди. Хусусан, дарёнинг Қирғизистондаги қисмидаги таянч пунктини ҳамкорликда таъмирлаш, шунингдек сув ресурсларининг ҳисобини тезкор ва аниқ юритиш учун сув ўлчовчи ускуналарни ўрнатиш масаласи кўриб чиқилди.
Сўнгра Ўзбекистон томонидан Қирғизистондаги ҳамкасбларга сув хўжалиги фаолиятида фойдаланиш учун махсус техниканинг вақтинчалик тақдим этилиши масаласи ўртага ташланди. Яна бир масала – Наманган вилоятида Подшоота дарёсининг Қирғизистондаги қисмида экотуризм тўғрисида уни кейинчалик ривожлантириш мақсадида маълумот тарқатилишига кўмаклашиш бўлди.
Бундан ташқари, иштирокчилар жорий йилнинг 12—14 июнь кунлари илк Подшоота дарёси кунини Қирғизистон Республикаси ҳудудида ўтказишга қарор қилди.
Изоҳ (0)