Сурхондарёлик фирибгар МИБ ходимига ўзини ҳамкасби сифатида таништириб, пул ундирмоқчи бўлди

Сурхондарё вилоятининг Музработ туманида яшовчи, вақтинча ҳеч қаерда ишламайдиган Тўра Қиёмов (исм-шарифлар ўзгартирилган) ўзини МИБ Термиз тумани бўлими ходими сифатида таништириб, ушбу идоранинг Музработ тумани бўлими давлат ижрочиси Соҳиб Пардаевни чув туширмоқчи бўлди. Бу ҳақда ЎзА хабар берди.

С.Пардаев иш юритувидаги мавжуд ижро ҳужжати бўйича Т.Қиёмовнинг яшаш уйига борди. Ходимни кутиб олган синглиси Т.Қиёмовнинг уйда йўқлигини айтгач, у билан телефон орқали сўзлашади. Телефонда МИБ Термиз тумани бўлимида ишлаётганини айтган Т.Қиёмов Музработ тарафларга боришга вақти йўқлигини маълум қилиб, «ҳамкасби»ни Термизга таклиф этади. Шаҳарга келиб, қўнғироқ қилсаз, учрашиб, гаплашиб олиш истагини билдиради.

С.Пардаев шаҳар марказидаги Ақлли бекатга келгач, рўпарасига Nexia русумли енгил машина келиб тўхтади. Олд ўриндиқда Т.Қиёмов яшил рангдаги прокуратура формасида савлат тўкиб ўтирган эди. Мезбоннинг таклифи билан биргаликда «Афродита» ошхонасига борди. Шу ерда у Мажбурий ижро бюросида ишлаётганини яна алоҳида таъкидлаб, уст-бошининг чангини артган бўлди.

— Яқинда унвон олдим, — деди бамайлихотир. – Раҳбарлар билан яхши муносабатдаман. Хизмат ҳам ёмон эмас.

Бу гапларни тинглаб ўтирган С.Пардаев «уддабурон» суҳбатдошига юзланди:

— Олий маълумотли яқин танишим ишга ўтмоқчи эди.

— Майли, қуруғидан санаса бажарамиз, — Т.Қиёмовнинг чеҳраси янада очилди.

Шу заҳоти у таниши Вали Сувоновни ошхонага таклиф этди.

Бўлажак ходим билан яқиндан танишгач, турли саволлар билан унинг билими ва дунёқарашини синаб кўрган ҳам бўлди.

— Ишга киритишнинг арзимаган харажати бор. 6 минг доллар олиб келсангиз, ҳал қилиб бераман, — деди 33 ёшдаги «прокурор» йигит.

С.Пардаев ҳам анойи эмас экан. Ҳуқуқ-тартибот идораларига мурожаат этиб, фирибгарга нисбатан тегишли чора кўришни сўради.

Вилоят ички ишлар бошқармаси ходимлари томонидан ўтказилган тезкор тадбирда Т.Қиёмовнинг сири фош этилди. У Термиз шаҳридаги кафеда 3300 долларни санаб олаётганида қўлга тушиб қолди.

Айни пайтда мазкур ҳолат юзасидан тегишли жиноят иши қўзғатилиб, тергов ҳаракатлари олиб борилмоқда.