Қибрайда бузилаётган уйлар: ҳақиқат ким томонда?

Тошкент вилояти Қибрай туманида янги қурилаётган уйларнинг бузилаётгани ва оқибатда уй эгалари жабр кўраётгани ҳақидаги хабарлар ижтимоий тармоқларда пайдо бўлган эди. Мазкур хабарларда туманнинг «Янги Ўнқўрғон» маҳалласи ҳудудида жойлашган қишлоқ хўжалиги ер майдонида фуқаролар томонидан қурилиши бошланган уйлар туман ҳокимлиги томонидан бузиб ташлангани, бу уйлар қонунчиликка мос равишда қурилгани, барча ҳужжатлари мавжудлиги қайд этилган эди. ЎзА жараённи ўрганди.

Хабарда қайд этилишича, юқорида қайд этилган манзилдаги уйлар ҳақиқатдан ҳам бузиб ташланмоқда. Қибрай тумани ер ресурслари ва давлат кадастр бўлими маълумотига кўра, қурилишлар белгиланган тартибга мувофиқ эмас.

Хусусан, туман қишлоқ хўжалиги харитасининг 328-330 контурида жойлашган ер майдонлари туман давлат захира ерлари таркибига киритилган бўлиб, жами 9,78 гектарни ташкил этади. Бу ер «Турон Замин Агрофирма»сига тегишли бўлиб, М.Тожиева раҳбарлигидаги «Турон Сардор Жавоҳир» фермер хўжалигига ижара асосида фаолият юритиши учун берилган. Кейинчалик ушбу ер туман захирасига қайтариб олиниб, 2019 йилда сабзавотчилик йўналиши бўйича 15 лойиҳа бўйича танловга қўйилган.

Ер мониторингини юритиш, ер қонунининг бузилиш ҳолатларини бартараф этиш ва олдини олиш бўйича ўтказилган ўрганишда 0,60 гектар ер майдони бир гуруҳ фуқаролар томонидан ноқонуний равишда эгаллаб олингани аниқланган.

Ушбу ер майдони бир неча йиллар давомида бўш ётиб, нега бирдан ўзбошимчалик билан эгаллаб олинган, деган савол туғилиши табиий албатта. Маълумки, «2018 йил 20 апрелдаги «Фуқароларни ижтимоий қўллаб-қувватлаш бўйича қўшимча чора-тадбирлар ҳамда ўзбошимчалик билан қурилган турар жойларга нисбатан мулк ҳуқуқини эътироф этиш бўйича бир марталик умумдавлат акциясини ўтказиш тўғрисида»ги Президент фармонида фуқароларнинг ўзбошимчалик билан эгаллаб олинган ер участкалари ёки иморат қуриш учун рухсатнома олмасдан қурилган турар жойларига нисбатан мулк ҳуқуқини эътироф этиш бўйича бир марталик умумдавлат акцияси эълон қилинган эди.

Фармонга кўра, ноқонуний қурилган уйга нисбатан мулк ҳуқуқини олиш учун иморат жойлашган ҳудуддаги давлат хизматлари маркази орқали туман (шаҳар) ҳокимига ариза билан мурожаат қилиш лозим. Юқоридаги ҳолатда эса бунга амал қилинмаган.

Туман ер ресурслари ва давлат кадастр бўлими мутахассислари томонидан мазкур ер тарихи интернет орқали ўрганилганда, 2019 йил январь ойидан бошлаб юқорида қайд этилган ҳудуд фуқаролар томонидан эгаллана бошлангани аниқланган.