Ўзбекистонда давлат ташрифи билан бўлиб турган Жанубий Корея президенти Мун Чжэ Ин Самарқанд шаҳрига келди. Президент матбуот хизматининг хабар беришича, Президент Шавкат Мирзиёев ва президент Мун Чжэ Ин рафиқалари билан Самарқанддаги тарихий обидаларни кўздан кечирган.
Давлат раҳбарлари дастлаб Мирзо Улуғбек расадхонаси ва музейини бориб кўрди. Мирзо Улуғбек ҳақида кореяликлар ҳам маълумотга эга экани, бу ерга келган киши унинг зеҳни, илм-фан ривожига қўшган ҳиссаси катталигига яна бир бор ишонч ҳосил қилиши таъкидланди.
Ўзбекистон ва Жанубий Корея Президентлари «Афросиёб» музейида ҳам бўлди. Бу музей Самарқанд шаҳрининг уч минг йиллик тарихидан ҳикоя қилади. VII асрга оид деворий суратлардан бирида Самарқанд ҳукмдорининг қадимги Корея – Когурё элчисини қабул қилиш маросими ҳам акс этган.
Жанубий Корея президенти ушбу тарихий суратни ҳайрат ва эътибор билан томоша қилар экан, икки мамлакат халқлари ўртасидаги алоқалари узоқ ўтмишга бориб тақалишини, бу дўстлик ва ҳамкорлик бундан кейин ҳам бардавом бўлишини таъкидлади.
Шу ерда, давлат раҳбарлари ҳузурида Ўзбекистон Фанлар академияси билан Жанубий Кореянинг Маданий мерос маъмурияти ўртасида имзоланган маданий мерос соҳасида ҳамкорлик тўғрисидаги англашув меморандуми ўзаро алмашилди.
Жанубий Корея президенти Registonдаги ҳар бир обида, миллий ҳунармандчилик маҳсулотлари кўргазмаларини ҳайрат билан томоша қилди. Олий мартабали меҳмонга мадрасаларнинг қурилиш тарихи, пештоқларидаги нақш ва рамзларнинг мазмуни ҳақида сўзлаб берилди.
Амир Темур мақбараси зиёрати чоғида меҳмонларга тарихий саркарданинг давлатчилик сиёсати, ҳарбий маҳорати, турли мамлакатлар билан дипломатик алоқалари ҳақида сўзлаб берилди. «Соҳибқирон бобомиз ва темурийлар давлати ўз даврининг энг улкан ва ривожланган мамлакати бўлгани меҳмонларда катта таассурот қолдирди», — дейилади расмий ахборотда.
Изоҳ (0)