Қозоғистон Сенати раиси, мамлакат биринчи президентининг қизи Дариға Назарбоева Жамбил вилояти Қўрдай туманида юз берган автобус иштирокидаги йирик йўл-транспорт ҳодисаси муносабати билан ҳамдардлик билдирди, дея хабар бермоқда Tengrinews.
«Жамбил вилоятида 11 кишини ҳаётдан олиб кетган фожиали йўл-транспорт ҳодисаси оқибатлари юзасидан чуқур таъзия изҳор қиламан. Ҳалок бўлганларнинг қариндошлари ва яқинларига самимий ҳамдардлик ва қувватлов сўзларини етказаман, барча жабрланувчиларнинг тезроқ соғайиб кетишларини тилайман. Ҳозирги вақтда тегишли барча тиббий ёрдам кўрсатилмоқда, хизматлар ишламоқда, ҳодисанинг барча тафсилотлари аниқланмоқда», — дейилади Қозоғистон Сенати матбуот хизмати томонидан эълон қилинган ахборотда.
Эслатиб ўтамиз, «Тошкент—Олмаота» йўлининг Жамбил вилояти Қўрдай туманидан ўтган 181-километрида 20 апрель куни маҳаллий вақт билан соат 5:09 да 49 кишини олиб кетаётган Van Hool русумли автобус ағдарилиб кетган эди. Дастлабки маълумотларга кўра, автобус ҳайдовчиси ундан олдинда кетаётган Toyota автомобили ва юк машинаси иштирокидаги ЙТҲ юз бергач, ундан қочаман деб йўналишини кескин ўзгартириши оқибатида автобус ағдарилган.
Ўзбекистон Фавқулодда вазиятлар вазирлигининг сўнгги маълумотларига кўра, ҳодиса оқибатида 11 киши, жумладан, уч нафар Ўзбекистон фуқароси ҳалок бўлган. Тан жароҳати олган 32 кишининг 13 нафари ўзбекистонлик бўлиб, улардан уч нафарининг аҳволи оғирлиги айтилмоқда. Президент Шавкат Мирзиёев ҳодиса оқибатида ҳалок бўлган ва тан жароҳати олганларни Ўзбекистонга қайтариш бўйича топшириқ берган.
Изоҳ (0)