Видео: Қўқондаги ЙТҲга учраган автомобиллар «паради»

Фарғона ва Қўқон шаҳарларида Йўл ҳаракати хавфсизлиги бошқармаси томонидан йўл-транспорт ҳодисасига учраган автомобиллар «паради» уюштирилди.

Telegram каналларида тарқалган видеодан маълум бўлишича, йўл-транспорт ҳодисасига учраган ҳар бир машина қайсидир ҳолатга бағишланган.

Уларга «Чарчоқни енгаман дема, уйқунг келдими, тўхта», «Бегуноҳ одамнинг бошига мусибат солманг», «Рулда телефонда гаплашма», «Тезликни ошириб, умрингни қисқартирма» каби изоҳлар берилган. Машиналарда ҳатто «ҳалок бўлган» ҳайдовчиларни ҳам кўриш мумкин.

Фарғона вилояти ИИБ йўл ҳаракати хавфсизлиги бошқармаси маълумотига кўра, ушбу тадбир «Йўл ҳаракати хавфсизлиги тарғибот куни» ва «Автомобильсиз кун» акциялари доирасида ҳайдовчи ва пиёдаларни ҳушёрликка чақириш, йўл ҳаракати қоидаларига риоя қилишга даъват этиш мақсадида ўтказилган.

Вилоятнинг барча шаҳар-туманларида «Тарғибот автокарвонлари» ташкил этилиб, одамларга йўл-транспорт ҳодисалари қандай мудҳиш оқибатларга олиб келиши тушунтирилган.

Шунингдек, акцияси давомида Фарғона политехника институти талабалари, Фарғона ва Қўқон шаҳар паралимпия жамоалари иштирокида футбол мусобақаси ҳам ташкил этилиб, ёшларга соғлом турмуш тарзи тарғиб қилинган.