O‘zbekistonda davlat tashrifi bilan bo‘lib turgan Janubiy Koreya prezidenti Mun Chje In Samarqand shahriga keldi. Prezident matbuot xizmatining xabar berishicha, Prezident Shavkat Mirziyoyev va prezident Mun Chje In rafiqalari bilan Samarqanddagi tarixiy obidalarni ko‘zdan kechirgan.
Davlat rahbarlari dastlab Mirzo Ulug‘bek rasadxonasi va muzeyini borib ko‘rdi. Mirzo Ulug‘bek haqida koreyaliklar ham ma’lumotga ega ekani, bu yerga kelgan kishi uning zehni, ilm-fan rivojiga qo‘shgan hissasi kattaligiga yana bir bor ishonch hosil qilishi ta’kidlandi.
O‘zbekiston va Janubiy Koreya Prezidentlari “Afrosiyob” muzeyida ham bo‘ldi. Bu muzey Samarqand shahrining uch ming yillik tarixidan hikoya qiladi. VII asrga oid devoriy suratlardan birida Samarqand hukmdorining qadimgi Koreya – Koguryo elchisini qabul qilish marosimi ham aks etgan.
Janubiy Koreya prezidenti ushbu tarixiy suratni hayrat va e’tibor bilan tomosha qilar ekan, ikki mamlakat xalqlari o‘rtasidagi aloqalari uzoq o‘tmishga borib taqalishini, bu do‘stlik va hamkorlik bundan keyin ham bardavom bo‘lishini ta’kidladi.
Shu yerda, davlat rahbarlari huzurida O‘zbekiston Fanlar akademiyasi bilan Janubiy Koreyaning Madaniy meros ma’muriyati o‘rtasida imzolangan madaniy meros sohasida hamkorlik to‘g‘risidagi anglashuv memorandumi o‘zaro almashildi.
Janubiy Koreya prezidenti Registondagi har bir obida, milliy hunarmandchilik mahsulotlari ko‘rgazmalarini hayrat bilan tomosha qildi. Oliy martabali mehmonga madrasalarning qurilish tarixi, peshtoqlaridagi naqsh va ramzlarning mazmuni haqida so‘zlab berildi.
Amir Temur maqbarasi ziyorati chog‘ida mehmonlarga tarixiy sarkardaning davlatchilik siyosati, harbiy mahorati, turli mamlakatlar bilan diplomatik aloqalari haqida so‘zlab berildi. “Sohibqiron bobomiz va temuriylar davlati o‘z davrining eng ulkan va rivojlangan mamlakati bo‘lgani mehmonlarda katta taassurot qoldirdi”, — deyiladi rasmiy axborotda.
Izoh (0)