20 апрель куни Тошкентда Соғлиқни сақлаш вазири Алишер Шодмонов ва Жанубий Корея Соғлиқни сақлаш ва ижтимоий таъминот вазири Пак Нинг Ху ўртасида учрашув бўлиб ўтди. Бу ҳақда «Дарё»га вазирлик матбуот хизмати маълум қилди.
Учрашувда соғлиқни сақлаш соҳасида Ўзбекистон—Корея ҳамкорлиги марказини ташкил этиш тўғрисидаги ўзаро англашув меморандуми алоҳида аҳамият касб этиши айтиб ўтилди. Мазкур марказнинг очилиши икки мамлакат ўртасида соғлиқни сақлаш соҳасидаги ҳамкорликни мустаҳкамлаб, икки давлат мутахассислари ўртасида билим ва тажриба алмашинув фаоллашишига ёрдам беради.
Меморандумга кўра, соғлиқни сақлаш соҳасидаги ислоҳотларни амалга оширишнинг бош режаси, шу жумладан, соҳанинг ҳуқуқий асослари, тиббиёт ходимларининг билимларини мунтазам такомиллаштириш, давлат-хусусий сектор ҳамкорлиги ҳамда тиббий туризм ва тиббий суғурта соҳасида мутахассислар алмашинуви бўйича қўшма лойиҳалар ишлаб чиқилади.
Ўзбекистон—Корея форуми доирасида соғлиқни сақлашни ривожлантиришга оид ўзаро англашув меморандуми, Соғлиқни сақлаш вазирлиги ва Корея Халқаро ҳамкорлик жамияти ўртасида имзоланган ишошилинч тиббий ёрдам кўрсатиш соҳасидаги ҳамкорлик тўғрисидаги меморандум, шунингдек, Корея Республикасининг Кёнг Бук университети клиникаси ва Самарқанд давлат тиббиёт институти клиникалари ўртасида ўзаро англашув меморандуми имзолангани ҳам учрашувда алоҳида эътироф этилди.
Мулоқотда тиббиёт соҳасини ривожлантириш йўлидаги ҳамкорликни бундан буён ҳам изчил давом эттиришга келишиб олинди.
Учрашув якунида Пак Нинг Ху «Ўзбекистон Республикаси соғлиқни сақлаш аълочиси» кўкрак нишони ҳамда Тошкент тиббиёт академиясининг фахрий профессори унвони билан тақдирланди.
Изоҳ (0)