Самарқанд шаҳри бўйича Ички ишлар органлари фаолиятини мувофиқлаштириш бошқармаси 5-ички ишлар бўлими таянч пунктлари фаолиятини ташкиллаштириш гуруҳи таянч пунктлари профилактика катта инспектори лавозимида ишлаган Суҳроб Маматовга фуқародан пора талаб қилганлиги учун 5 йил муддатга озодликни чеклаш жазоси тайинланди. Бу ҳақда «Дарё» мухбири хабар бермоқда.
Суҳроб Маматов ўзининг хизмат ваколатига кирмаса ҳам фуқаро Гулчеҳра Ибрагимовани Ўзбекистондан Украина давлати орқали Туркия давлатига «хорижга чиқиш стикери»ни олмасдан чиқиб, сўнг Ўзбекистон Республикасига «Ўзбекистонга қайтиш гувоҳномаси» билан қайтганлиги учун жиноий иш қўзғатилишини маълум қилиб, фуқарони бунга ишонтирган. Суҳроб Маматов фуқаро Гулчеҳра Ибрагимовага 700 АҚШ доллари миқдоридаги пора эвазига жавобгарликдан қутқариб қолишини таклиф этган.
Гулчеҳра Ибрагимовага ҳуқуқ-тартибот идораси ходимининг ноқонуний ҳаракатлари тўғрисида тегишли идора вакилларига маълум қилган. Кўрилган тадбирлар натижасида Суҳроб Маматов Гулчеҳра Ибрагимовадан 700 долларни олган вақтда ҳуқуқни муҳофаза қилувчи орган вакиллари томонидан жиноят устида қўлга олинган.
Жиноят ишлари бўйича Самарқанд шаҳар судида кўриб чиқилган суд ишида Суҳроб Маматовнинг қилмиши гувоҳларнинг кўрсатмалари билан ҳам тўлиқ исботланди. Суд ҳукмига кўра Суҳроб Маматов Жиноят Кодексининг 25, 28,168 ва 211-моддаларининг тегишли бандларига асосан айбдор деб топилиб, уч йил муддатга муайян ҳуқуқдан, яъни ички ишлар тизимида моддий ҳамда мансабдорлик лавозимларида ишлаш ҳуқуқидан маҳрум қилиниб, 5 йил муддатга озодликни чеклаш жазоси тайинланди.
Изоҳ (0)