Тошкент шаҳрида 18 апрель куни Uzmobile тармоғини тижорат фойдаланишга топширилишининг 4 йиллигига бағишланган матбуот анжумани бўлиб ўтди, дея хабар беради «Дарё» мухбири.
Анжиманда «Ўзбектелеком» АК тижорат директори Алишер Зуфаров Uzmobile GSM тармоғи ривожланишини учта мезон билан тавсифлади: барча минтақаларда доимий кенгайтириш, мобил интернетни тезлаштириш ва тарифлардаги катта янгиланишлар.
«Биз Ўзбекистон GSM стандарти юқори рақобатли бозорига охирги бўлиб келдик. Бу осон кечмади. Шу қисқа вақт мобайнида биз нафақат жуда танилган ўйинчилар билан рақобатлаша олишимизни, балки замонавий, юқори тезликка эга ва кенг Uzmobile GSM тармоғини қуришга қодир эканлигимизни исботлай олдик, техник имкониятларимиз бизга бугунги кунда энг инновацион хизматлар ва юқори сифатли арзон тарифларни тақдим этиш имконини берди», – деди Алишер Зуфаров.
Ҳозирги вақтда Uzmobile ташқи канали 30 Гбит/с гача кенгайтирилди, бу эса абонентларга янада юқори тезликдаги ва арзон мобил интернет тарифларини тақдим этиш имконини беради.
Жорий йилда Uzmobile CDMA фаол абонентлари сонини 31 фоизга (220 мингга) ва Uzmobile GSM тармоғи фаол абонентлари сонини 36 фоизга (4,6 миллионга) ошириш режалаштирилган.
Бугунги кунда Ўзбекистоннинг барча минтақаларида 2G/3G ва 4G технологиялари бўйича Uzmobile тармоғининг кенгайтирилиши давом этмоқда. 2019 йил охиригача аҳоли пунктларида Uzmobile тармоғининг қамраб олиши ўртача 87 фоизгача, Uzmobile GSM ва Uzmobile CDMA 90 фоизгача оширилади.
Компаниянинг алоқа сифатини яхшилаш бўйича ишлари алоҳида қайд этилди.
Масалан, Тошкент, Самарқанд, Бухоро, Термиз, Нукус, Навоий ва Урганч шаҳарларидаги халқаро аэропортлар биносида ички ва ташқи мобил алоқа қамровининг сифати яхшиланди.
Сайёҳларга ва умуман туризмга қулайликларни ривожлантиришга йўналтирилган янги ечимлар жорий этилади. Барча аэропортларда, темир йўллар вокзалларида, автовокзалларда ва энг диққатга сазовор, оммабоп ҳудудларда WiFi зоналари ва хизмат кўрсатиш офисларини ривожлантириш ишлари олиб борилмоқда. Давлат сегментининг (B2G) ҳар бир соҳаси учун персонал ечимлар ва тарифлар ишлаб чиқилмоқда.