Ўзбекистондаги деҳқон хўжаликлари ва томорқаларда жорий йили 3,5 млн тонна сабзавот етиштирилади

Деҳқон хўжаликлари ва томорқа ер участкаларидан фойдаланиш самарадорлигини ошириш чора-тадбирлари тўғрисидаги ҳукумат қарори қабул қилинди. Бу ҳақда «Ҳуқуқий ахборот» канали маълум қилди.

Қарор билан Қорақалпоғистон Республикаси ва вилоятларда 2019 йилда деҳқон хўжаликлари ва томорқа ер участкаларига қишлоқ хўжалиги экинларини жойлаштириш кўрсаткичлари тасдиқланди.

Унга мувофиқ, республикада қарийб 172 минг гектар деҳқон хўжаликлари ва томорқа ер участкаларига сабзавотлар экилади ҳамда 3,5 миллион тоннадан кўпроқ сабзавот етиштирилади.

Шундан 23 минг гектар ерга пиёз, 18 минг гектарга сабзи экилади.

Жами 31,5 минг гектар ердан 667 минг тонна полиз экинлари, 47 минг гектардан 1 миллион тоннадан кўпроқ картошка, 26700 гектардан 80 минг тонна дуккакли экинлар олиш режалаштирилган.

Жами етиштирилган маҳсулотларнинг деярли 5 миллион тоннаси ички истеъмол учун, 690 минг тоннаси экспортга йўналтирилади.