15—16 апрель кунлари Россиянинг Сочи шаҳрида «Атомэкспо-2019» форуми бўлиб ўтди. Ушбу форумда 74 дан ортиқ мамлакатлар делегацияси иштирок этди, деб хабар берди «Дарё» мухбири Севара Нишонова.
Жорий йилда форум доирасида имзоланган шартнома ва келишувлар сони ортди. Икки кун давом этган форум чоғида 40 дан ортиқ ҳужжат имзолаш маросими ташкил этилди.
Форум сессияларида 650 дан ортиқ компаниялар, 4000 дан делегат ва меҳмонлар иштирок этди.
Форум ишини дунёнинг турли мамлакатларидан келган 290 дан ортиқ ОАВ вакиллари ёритди.
Ўзбекистон делегацияси форумда иккинчи марта иштирок этди. Форум давомида Ўзбекистонда АЭС қурилиши бўйича дирексия директори Отабек Омонов журналистлар билан суҳбатлашди.
«Бизнинг дирексиямиз Вазирлар Маҳкамаси қарорига асосан ташкил этилган. Ҳозирги кунда дирексиямизда штатларни кенгайтириш, мутахассисларни тайёрлаш ва уларни ишга олиш каби жараёнлар кетмоқда.
Ҳозирда биз ‘Росатом’ мутахассислари билан музокаралар олиб бориб, музокаралар натижасида инженеринг, керакли мутахассислар тайёрлаш, керакли конструктив қарорларни қабул қилишни режалаштирганмиз. ‘Атомекспо-2019’ форуми бизга бу борада ёрдам берди. Ўзбекистон делегация ушбу форумда фаол иштирок этди. Бир неча хорижий компаниялар вакиллари билан учрашиб, Ўзбекистондаги биринчи АЭС қурилиши учун зарур бўлган маълумотларни олдик.
Биз ҳозирда АЭС қурилиши дирексиясига хорижлик мутахассисларни жалб этишда давом этмоқдамиз. Хусусан, Россия ва Беларусь каби мамлакатлардан мутахассисларни ишга олдик», — дейди Ўзбекистонда АЭС қурилиши бўйича дирексия директори Отабек Омонов.
Изоҳ (0)