Ҳукуматнинг 2019 йил 17 апрелдаги қарори билан Хорижда истиқомат қилаётган ватандошлар ва уларнинг оила аъзоларини Ўзбекистонга таклиф қилишни расмийлаштириш, кўп марталик кириш визаларини бериш ҳамда уларни ички ишлар органлари томонидан вақтинча прописка қилиш тартиби тўғрисидаги низом тасдиқланди. Бу ҳақда Адлия вазирлигининг «Ҳуқуқий ахборот» канали хабар берди.
Низомга мувофиқ, ватандошларни Ўзбекистонга таклиф қилиш учун Миграция ва фуқароликни расмийлаштириш бошқармаларига, шаҳар бўлимларига (МваФР) қуйидагилар тақдим этилади:
- ариза-анкета;
- таклиф қилувчининг паспорти;
- ватандошнинг шахсини тасдиқловчи ҳужжат;таклиф қилувчининг ватандош билан қариндошлигини тасдиқловчи ҳужжат;
- ватандош Ўзбекистонга оила аъзолари билан келмоқчи бўлса, уларнинг шахсини ва қариндошлигини тасдиқловчи ҳужжатлар;
- таклиф қилувчининг 3,5×4,5 икки дона расми;давлат божи тўланганлиги ҳақида квитансия (20 минг 273 сўм).
МваФР ваколатли орган билан келишганидан ва ижобий қарор қабул қилганидан сўнг таклифнома тўлдирилади ва таклиф қилувчига берилади. Таклиф қилиш ҳақидаги ҳужжатларни кўриб чиқиш муддати 15 иш кунидан ошмаслиги лозим.
Таклифнома 3 ой амал қилади ва у кириш визаларини расмийлаштириш учун Ташқи ишлар вазирлигининг Консуллик-ҳуқуқий департаменти ёки вазирликнинг ҳудудий бўлинмаларига қуйидаги ҳужжатлар билан берилади:
- виза талаби;
- e-visa.mfa.uz сайти орқали олинган электрон анкета;
- ватандошнинг шахсини тасдиқловчи ҳужжат;
- кириш визалари Тошкент халқаро аэропортида олиниши мўлжалланган ҳолатларда — авиачипта ёки брон нусхалари;
- давлат божи тўланганлиги ҳақида квитансия (300 доллар).
Таклиф қилувчи ватандошни вақтинча прописка қилдириш учун МваФРга мурожаат қилади ва МваФР бўлинмаси 2 иш кунида 2 йиллик пропискани расмийлаштиради.
Изоҳ (0)