Жаҳон Соғлиқни Сақлаш Ташкилоти (ЖССТ) томонидан Женевада чоп этилган маълумотлар дунёдаги қизамиқ билан касалланишнинг кескин ўсишини кўрсатди, дея хабар беради «ТАСС».
2019 йилнинг январь—март ойларида ушбу касаллик билан касалланиш ҳолати 112 мингдан ортган, бу 2018 йилнинг ушбу даврида 28 мингта касаллик қайд этилгани билан таққослаганда тўрт баробар ўсиш дегани.
ЖССТда таъкидланишича, бу рақамлар «расмий» эмас, балки фақат дастлабки тахминлардир. Экспертларнинг фикрича, қизамиқнинг ҳақиқий сони сезиларли даражада юқори бўлади.
«Дастлабки маълумотларга кўра, 2019 йилнинг дастлабки уч ойлигида 2018 йилга нисбатан касаллик қайд этилганлик ҳолати 300 фоизга ошган» — дейилади ҳисоботда. Жаҳон соғлиқни сақлаш ташкилоти, қизамиқ касаллигининг кўпайиши кетма-кет уч йил давомида кузатилганлигини эслатган.
«Ҳозирги кунда дунёнинг 170 мамлакатида 112163 қизамиқ касаллиги қайд этилган. Ўтган йилнинг шу даврида 163 мамлакатда 28124 қизамиқ касаллиги қайд этилган».
Қизамиқ эпидемияси кўплаб мамлакатларда, жумладан, Грузия, Қозоғистон, Қирғизистон, Украина, Конго Демократик Республикаси, Эфиопия, Мадагаскар, Мьянма, Филиппин ва Суданда қайд этилган. Ушбу эпидемиялар асосан ёш болалар орасида юқори ўлим кўрсаткичлари билан тавсифланади. Охирги ойларда касаллик эмлаш юқори даражада бўлган мамлакатларда, хусусан, АҚШ, Исроил, Таиланд ва Тунисда тарқалган — бу ерда касаллик асосан эмланмаганларда қайд этилган.
Изоҳ (0)