Бухоролик ҳайдовчининг хонадонига юборилган 1 миллиард 13 миллион 652 минг 19 сўм миқдоридаги жарима ҳақидаги огоҳлантириш хати бланкага электрон киритишда техник хатоликка йўл қўйилган. Бу ҳақда Бухоро вилоят ИИБ ЙҲХБ матбуот хизмати «Дарё»га маълум қилди.
Бухоро шаҳар ИИБ Йўл ҳаракати хавфсизлиги бошқармаси инспектори ҳайдовчининг ушбу қоидабузарлиги учун унга нисбатан КВ 18028702850-рақамли Жарима солиш тўғрисида қарор чиқарган. Маъмурий жавобгарлик тўғрисидаги кодекснинг 248, 304, 306 ва 307-моддаларига асосланган ҳолда бланкада чиқарилган қарорда Lacetti ҳайдовчисига нисбатан 1 013 652 019 сўм миқдоридаги жарима жазоси суммаси рақам ва сўз билан ёзилган.
Огоҳлантириш хати бланкада қандай ёзилган бўлса, шундай ҳолатда фуқаро У.М. хонадонига борган. Вилоят ИИБ ЙҲХБ матбуот хизматининг маълум қилишича, ҳайдовчи ушбу бланкада кўрсатилган жарима миқдорининг тегишли органдан тўғри ёки нотўғри эканлигини суриштирмай туриб, ўз танишлари орқали Telegram мессенжеридаги канал ва гуруҳларга жойлаштирган. Бланканинг ижтимоий тармоқларга тарқалишини таъминлаган ҳайдовчига тушунчалар берилди.
— Ҳуқуқбузарлик ҳолатини содир этган ҳайдовчига нисбатан жарима солиш тўғрисида чиқарилган ушбу қарор вилоят ИИБ маъмурий амалиёт бўлими бошлиғи томонидан таҳлилий ўрганилди. Унга кўра, ИИБ йўл ҳаракати хавфсизлиги бошқармаси инспектори томонидан расмийлаштирилаётган вақтда ҳужжат техник хато туфайли жарима суммаси сана билан қоришиб, автоматик тарзда яхлит миқдорга айланиб қолган. Техник хато ўз вақтида бартараф этилди. Қоидабузар ҳайдовчи эса қонунда белгилангандек жарима миқдорини тўлади, — дейилади Бухоро вилояти ИИБ ЙҲХБ матбуот хизмати хабарида.
Изоҳ (0)