2019 йил биринчи чорагида Давлат молиявий назорати бош бошқармаси ва унинг ҳудудий бошқармалари томонидан 1993 та назорат тадбирлари ўтказилди. Бу ҳақда Молия вазирлиги маълум қилди.
Йирик миқдорда молиявий хато ва камчиликлар Жиззах (5,3 миллиард сўм), Сурхондарё (2,5 миллиард сўм), Фарғона (2,1 миллиард сўм), Самарқанд (2,1 миллиард сўм), Қашқадарё (1,9 миллиард сўм), Андижон (1,5 миллиард сўм), Тошкент (1,3 миллиард сўм) вилоятларида ва Тошкент шаҳрида (2,6 миллиард сўм) аниқланган.
Бюджет интизомини бузилишига йўл қўйган бюджет ташкилотларининг 67 нафар мансабдор ва масъул шахсларига қонунчиликда белгиланган тартибда 47,8 миллион сўмлик маъмурий жарималар қўлланди.
Бундан ташқари, 2019 йилнинг 1-чорагида Тошкент вилояти маҳаллий бюджетининг тузилиши ва ижроси юзасидан кенг қамровли назорат тадбири ўтказилиб, унда харажатлар сметаларида ортиқча режалаштириш, асоссиз иш ҳақи тўлаш, бажарилмаган ишлар учун тўловларни амалга ошириш, товар-моддий бойликларни ҳисоботга кирим қилмаслик ҳамда камомад ва ўзлаштиришлар каби 6,6 миллиард сўмлик молиявий хато-камчиликларга йўл қўйилганлиги аниқланди.
Назорат тадбири даврида кўрилган чора-тадбирлар ва кўрсатилган амалий ёрдамлар натижасида асоссиз сарфланган 4,5 миллиард сўм маблағларни бюджетга тикланиши таъминланиб, 0,7 миллиард сўмлик асоссиз харажатларнинг олди олинди.
Изоҳ (0)