АҚШнинг Мериден (Коннектикут штати) шаҳридаги мактаб бейсбол майдонига кичик самолёт қулаб тушган, икки киши жароҳатланган. Бу ҳақда «РИА Новости» хабар қилади.
Ҳодиса маҳаллий вақт билан 11 апрель, пайшанба куни кечки пайт содир бўлган. Шаҳар полицияси вакили Кристофер Фрай берган хабарларга кўра, яқин атрофда жойлашган аэродромда учувчи самолётда учиш ва қўнишни машқ қилаётган бўлган. Самолётда бўлган икки киши касалхонага ётқизилган.
Полиция маълумотига кўра, самолёт қулаган пайтда электр узатиш линиясига шикаст етказган. Оқибатда 13 мингга яқин маҳаллий аҳоли электрсиз қолган. 12 апрель, жума куни эрталаб электр таъминоти тикланди. Ҳодиса рўй берган мактабдаги машғулотлар жума куни бекор қилинди.
Воқеа сабаблари маълум қилинмаган. Hartford Courant газетасига кўра, ҳодиса Piper PA-28 самолёти билан содир бўлган. Мазкур ҳодиса юзасидан АҚШ федерал авиация бошқармаси (FAA) ва АҚШ транспорт хавфсизлиги Кенгаши тергов ишларини олиб боради.
Изоҳ (0)