AQShda samolyot maktab beysbol maydoniga qulab tushdi
AQShning Meriden (Konnektikut shtati) shahridagi maktab beysbol maydoniga kichik samolyot qulab tushgan, ikki kishi jarohatlangan. Bu haqda “RIA Novosti” xabar qiladi.
Hodisa mahalliy vaqt bilan 11-aprel, payshanba kuni kechki payt sodir bo‘lgan. Shahar politsiyasi vakili Kristofer Fray bergan xabarlarga ko‘ra, yaqin atrofda joylashgan aerodromda uchuvchi samolyotda uchish va qo‘nishni mashq qilayotgan bo‘lgan. Samolyotda bo‘lgan ikki kishi kasalxonaga yotqizilgan.
Politsiya ma‘lumotiga ko‘ra, samolyot qulagan paytda elektr uzatish liniyasiga shikast yetkazgan. Oqibatda 13 mingga yaqin mahalliy aholi elektrsiz qolgan. 12-aprel, juma kuni ertalab elektr ta’minoti tiklandi. Hodisa ro‘y bergan maktabdagi mashg‘ulotlar juma kuni bekor qilindi.
Voqea sabablari ma’lum qilinmagan. Hartford Courant gazetasiga ko‘ra, hodisa Piper PA-28 samolyoti bilan sodir bo‘lgan. Mazkur hodisa yuzasidan AQSh federal aviatsiya boshqarmasi (FAA) va AQSh transport xavfsizligi Kengashi tergov ishlarini olib boradi.
