Лондон полицияси WikiLeaks сайти асосчиси Жулиан Ассанжни қўлга олди. Бу ҳақда Sputnik хабар қилмоқда.
Хабарда ёзилишича, бугун, 11 апрель куни 47 ёшли Жулиан Ассанж Эквадорнинг Буюк Британиядаги элчихонасида пойтахт полицияси ходимлари томонидан ҳибсга олинган.
Таъкидланишича, Эквадорнинг Лондондаги элчихонасида бўлиб турган Ассанжга дипломатик бошпана тақдим этиш сўровномаси бўйича рад жавоби бериш ҳақида қарор қабул қилингандан сўнг полиция ходимлари таклиф қилинган.
Россия президенти матбуот котиби Дмитрий Песковнинг сўзларига кўра, Кремль Ассанжнинг ҳуқуқларига риоя қилинишига умид қилади.
Эслатиб ўтамиз, Ассанж АҚШнинг Афғонистон ва Ироқда олиб борган ҳарбий операциялари ва Гуантанамо лагерида сақлаш шароитлари ҳақида қатор маълумотларни эълон қилганидан сўнг танилган эди.
Швеция ҳуқуқни сақлаш органлари бир неча йил олдин Ассанж устидан жиноий иш қўзғатган. Ассанжнинг ўзи ушбу айблов ёлғон, бу иш фақат уни қамоққа олиш учун қилинганлигини айтиб, бир неча йилдан буён Лондондаги Эквадор элчихонасида, сиёсий бошпана берилган шахс сифатида яшаб келаётган эди.
Изоҳ (0)