Пойтахтда халқ таълими мутахассислари учун «Кундалик» лойиҳаси тақдим этадиган имкониятлар ва унинг афзалликларига бағишланган ўқув-амалий семинар бўлиб ўтди, бу ҳақда ЎзА хабар бермоқда.
Ушбу тизим кейинги ўқув йилидан бошлаб мамлакатнинг барча умумтаълим мактабларида татбиқ этилади. У янги тизимнинг самарадорлиги, маҳаллий ўқитувчиларнинг уни янада яхшилашга доир фикр-мулоҳазаларини билиш мақсадида аввал синовдан ўтказилади. Ўқув-амалий семинарда иштирок этган педагоглар ўқиш тугаганидан сўнг «Кундалик» тизимини амалиётда синаб кўради ва ўз ҳисоботлари ва хулосаларини ушбу платформа яратувчиларига тақдим этади.
Ўзбекистон Республикаси Халқ таълими вазирлигидан олинган маълумотларга кўра, мактабларда замонавий технологиялардан фойдаланиш қоғоз шаклидаги ҳисоботлар билан ишлашни сезиларли даражада қисқартириш, таълим жараёнини бошқариш ҳамда ўқувчиларнинг дарсга қатнаши ва уни ўзлаштиришига доир холис ҳисоботларни тайёрлаш воситасини яратиш имконини беради.
«Кундалик» лойиҳаси мамлакат мактабларида давлат-хусусий шерикчилиги доирасида ўқувчиларнинг дарсга қатнаши ва уни ўзлаштиришини қайд этиб бориш тизимини жорий этишни кўзда тутади. «Dnevnik.ru» МЧЖнинг Ўзбекистондаги вакили ҳисобланган «Кундалик» компанияси ушбу тизимни жорий этиш, қўллаб-қувватлаш ва ривожлантириш бўйича барча сарф-харажатларни ўз зиммасига олади.
Мазкур тизим дарс жадвали, ўқитувчиларнинг дарс режаларини онлайн-режимда тузиш, ўқувчиларнинг дарсга қатнаши ва уни ўзлаштиришини журнал ва кундаликнинг электрон шаклида қайд этиб бориш имконини беради ҳамда таълим ташкилотлари ва ушбу соҳа бошқарув органларини статистик ҳисоб-китобни тузиш воситалари билан таъминлайди. «Кундалик» тизими ўқувчилар ва уларнинг ота-оналарига ўқувчиларнинг ўзлаштириш баҳолари ва уй-вазифаларидан тун-у кун хабардор бўлиш, самарали мулоқот учун ҳимояланган ижтимоий тармоқ ва таълим ресурслари – онлайн-кутубхона ва медиатекадан фойдаланиш имкониятини таклиф этади.
««Кундалик» рақамли платформаси Ўзбекистон — Россия ўртасида таълим соҳасидаги муносабатларни ривожлантиришда муҳим лойиҳалардан бўлишига ишончимиз комил. Ҳамкорлигимиз мамлакат тараққиётига улкан ҳисса қўшадиган юқори малакали мутахассисларни тайёрлашга хизмат қилади», — дейди «Dnevnik.ru» МЧЖ бош директори Н.Леви.
Изоҳ (0)