8 апрель куни Тошкентда жамоат тартибини бузган ва ички ишлар органи ходимларининг қонуний талабини бажармаган икки эркак жавобгарликка тортилди. Бу ҳақда ИИББ матбуот хизмати хабар берди.
Маълум бўлишича, тахминан соат 11:00 да ИИББга Мусулмонлар идорасидан икки нафар номаълум шахслар жамоат тартибини бузганликлари тўғрисида маълумот келиб тушган. Воқеа жойига етиб келган ички ишлар органлари ходимлари раис муфтий Усмонхон Алимов билан учрашувни ташкиллаштиришни қўпол тарзда талаб қилаётган икки нафар эркакни тўхтатган.
Хабарда айтилиишича, Усмонхон Алимов хизмат сафарида бўлганлиги учун улар билан идора раисининг ўринбосари Абдулазиз Мансур учрашган. Аммо улар раис ўринбосари берган жавоблардан қониқмасдан, идора ходимларига қаратилган турли хил ҳақоратомус ўхшатишлар билан ўз талабларини изҳор этишда давом этган.
Ўзларининг ҳар бир ҳаракатларини телефон орқали ижтимоий тарқмоқларга тўғридан-тўғри узатиб видеога олган. Ички ишлар ходимларининг жамоат тартибини бузишни тўхтатиш ва Мусулмонлар идораси ходимлари билан конструктив суҳбатга ўтиш тўғрисидаги қонуний талабларига қатъий рад жавобини бергани сабабли уларга нисбатан маъмурий баённома тузилган.
Олмазор тумани маъмурий ишлар бўйича суди ушбу факт бўйича тўпланган материалларни ўрганиб чиқиб ва томонлар фикрларини эшитиб, 43 ёшли муқаддам бир неча бор судланган (шулар қаторида фирибгарлик учун ҳам) Р.К. ва 47 ёшли А.Т.ни Маъмурий жавобгарлик тўғрисидаги кодекснинг 183 («Майда безорилик») ва 194-моддаларида («Милиция ходимининг қонуний талабларини бажармаслик») кўрсатилган ҳуқуқбузарликни содир этганликда айбдор деб топган.
Изоҳ (0)