Андижон шаҳрида Бутунжаҳон саломатлик куни муносабати билан «Соғлиқ — ҳар бир инсоннинг ҳуқуқидир» шиори остида пиёда юриш ва гимнастрада тадбирлари ўтказилди. Унда вилоятдаги корхона-ташкилот ходимлари, талаба ва ўқувчи ёшлар, шаҳар ва туманлардан келган аҳоли вакилларидан иборат 40 мингга яқин киши иштирок этди. Бу ҳақда «Дарё» мухбири хабар бермоқда.
Вилоят ҳокими Шуҳратбек Абдураҳмонов мамлакатда аҳоли саломатлигини мустаҳкамлаш, ёшларни жисмоний фаоллигини оширишга алоҳида эътибор қаратилаётгани, бу Президент томонидан илгари сурилган беш муҳим ташаббусда ҳам ўз аксини топганини таъкидлади ва юришни ўзи бошлаб берди.
— Ёшим 72 га кирди, — дейди Турғунбой ота Муҳаммадзоҳидов. — Ҳозиргача спорт билан мунтазам шуғулланганим учун ўзимда чарчоқ хис этмадим. Қолаверса, доимо велосипед менинг ҳамроҳим. Бу аввало соғлигим учун зарурлигини тушунаман ва бошқаларга тавсия этаман.
Юриш иштирокчилари Шароф Рашидов, Алишер Навоий, Ислом Каримов шоҳкўчалари бўйлаб 10 километрга яқин масофани босиб ўтишиб, Эски шаҳарнинг Регистон майдонига янграган карнай-сурнай садолари остида кириб келди.
Бу ерда вилоят соғлиқни сақлаш бошқармаси тизимидаги даволаш-профилактика муассасалари томонидан тиббий кўриклар ва кўргазмалар ташкил этилди.
Ҳамшира ва шифокорлар ўзлари тайёрлаган парҳез таомлар, шифобахш дамламалар билан келувчиларни меҳмон қилди. Учрашув ва суҳбатлар чоғида саломатликни тарғиб этувчи материаллар — буклетлар, флаер, эслатмалар, шунингдек, «Бутунжаҳон саломатлик куни» рамзи туширилган эмблемалар тарқатилди.
Майдон ўртасидаги фаввора атрофида эса ёш спортчилар ўз маҳоратларини намойиш этишди. Андижон ихтисослаштирилган олимпия захиралари мактаб-интернати тарбияланувчиларининг қиличбозлик, оғир атлетика, бокс, қўл тўпи, волейбол, белбоғли кураш бўйича чиқишлари спорт соғлиқ гарови эканлигини намоён қилди.
Андижон давлат тиббиёт институти профессор-ўқитувчилари ҳамда талабаларининг инновацион ишланмалар ярмаркаси, ахборот-ресурс марказининг тиббий ўқув қўлланмалари, олимларнинг китоблари ва адабиётлар кўргазмаси ҳам иштирокчиларда катта таассурот уйғотди.
Андижон ихтисослаштирилган санъат мактаби оркестрининг чорлов мусиқалари, талаба хонандаларнинг куй-қўшиқлари тадбир иштирокчиларига кўтаринкилик бағишлади.
Вилоятдаги дори воситалари ва тиббий буюмлар ишлаб чиқарувчи йирик корхоналарнинг кўргазма ва намойишларида маҳаллий гиёҳлардан тайёрланадиган дориларга эътибор қаратилди.
Изоҳ (0)