Andijon shahrida Butunjahon salomatlik kuni munosabati bilan “Sog‘liq — har bir insonning huquqidir” shiori ostida piyoda yurish va gimnastrada tadbirlari o‘tkazildi. Unda viloyatdagi korxona-tashkilot xodimlari, talaba va o‘quvchi yoshlar, shahar va tumanlardan kelgan aholi vakillaridan iborat 40 mingga yaqin kishi ishtirok etdi. Bu haqda “Daryo” muxbiri xabar bermoqda.
Viloyat hokimi Shuhratbek Abdurahmonov mamlakatda aholi salomatligini mustahkamlash, yoshlarni jismoniy faolligini oshirishga alohida e’tibor qaratilayotgani, bu Prezident tomonidan ilgari surilgan besh muhim tashabbusda ham o‘z aksini topganini ta’kidladi va yurishni o‘zi boshlab berdi.
— Yoshim 72 ga kirdi, — deydi Turg‘unboy ota Muhammadzohidov. — Hozirgacha sport bilan muntazam shug‘ullanganim uchun o‘zimda charchoq xis etmadim. Qolaversa, doimo velosiped mening hamrohim. Bu avvalo sog‘ligim uchun zarurligini tushunaman va boshqalarga tavsiya etaman.
Yurish ishtirokchilari Sharof Rashidov, Alisher Navoiy, Islom Karimov shohko‘chalari bo‘ylab 10 kilometrga yaqin masofani bosib o‘tishib, Eski shaharning Registon maydonida yangragan karnay-surnay sadolari ostida kirib keldi.
Bu yerda viloyat sog‘liqni saqlash boshqarmasi tizimidagi davolash-profilaktika muassasalari tomonidan tibbiy ko‘riklar va ko‘rgazmalar tashkil etildi.
Hamshira va shifokorlar o‘zlari tayyorlagan parhez taomlar, shifobaxsh damlamalar bilan keluvchilarni mehmon qildi. Uchrashuv va suhbatlar chog‘ida salomatlikni targ‘ib etuvchi materiallar — bukletlar, flayer, eslatmalar, shuningdek, “Butunjahon salomatlik kuni” ramzi tushirilgan emblemalar tarqatildi.
Maydon o‘rtasidagi favvora atrofida esa yosh sportchilar o‘z mahoratlarini namoyish etishdi. Andijon ixtisoslashtirilgan olimpiya zaxiralari maktab-internati tarbiyalanuvchilarining qilichbozlik, og‘ir atletika, boks, qo‘l to‘pi, voleybol, belbog‘li kurash bo‘yicha chiqishlari sport sog‘liq garovi ekanligini namoyon qildi.
Andijon davlat tibbiyot instituti professor-o‘qituvchilari hamda talabalarining innovatsion ishlanmalar yarmarkasi, axborot-resurs markazining tibbiy o‘quv qo‘llanmalari, olimlarning kitoblari va adabiyotlar ko‘rgazmasi ham ishtirokchilarda katta taassurot uyg‘otdi.
Andijon ixtisoslashtirilgan san’at maktabi orkestrining chorlov musiqalari, talaba xonandalarning kuy-qo‘shiqlari tadbir ishtirokchilariga ko‘tarinkilik bag‘ishladi.
Viloyatdagi dori vositalari va tibbiy buyumlar ishlab chiqaruvchi yirik korxonalarning ko‘rgazma va namoyishlarida mahalliy giyohlardan tayyorlanadigan dorilarga e’tibor qaratildi.
Izoh (0)