Ўзбекистонда бўлиб турган Қозоғистон президентининг ёрдамчиси — Хавфсизлик кенгаши котиби Калмуханбет Касимов Президент ҳузуридаги Хавфсизлик кенгаши котиби Виктор Маҳмудов билан Юнусобод тумани 7-ички ишлар бўлимига келди. Бу ҳақда ИИВ матбуот хизмати маълум қилди.
Меҳмонларга Ички ишлар вазири Пўлат Бобожонов ва Тошкент шаҳар ИИББ бошлиғи Рустам Жўраев ҳамроҳлик қилди.
7-ички ишлар бўлимида аҳоли учун очиқлик, суткалик хизмат, фуқароларга тезкор ёрдам кўрсатиш имкониятлари мужассам бўлган. Бунинг учун бу ерда ёнғин хавфсизлик хизмати, «тез ёрдам», қутқариш хизмати, маиший хизматлар, Миллий гвардия қўриқлаш бўлими жойлаштирилган.
Меҳмонни бўлимда яратилган шароитлар қизиқтириб қўйди: бу ерда паспорт хизмати вакиллари, психологлар, қийин аҳволда қолган аёлларга ёрдам кўрсатувчи инспекторлар хизмат олиб боради, бўлим инновацион технологиялар ва профилактика инспекторлари учун махсус смартфонлар билан жиҳозланган.
Қозоғистон Хавфсизлик кенгаши котиби ушбу бўлимда, шунингдек, ИИВ ва пойтахт ИИББ раҳбарияти томонидан ҳар бир инсон ички ишлар ходими тимсолида ҳуқуқлари ҳимоячисини кўриши бўйича амалга оширилаётган чоралар ибратли даражада эканини қайд этди.
Изоҳ (0)