Шоир ва таржимон Аъзам Обид Тошкентда Халқаро ижод уйи қуриш ташаббуси билан Шавкат Мирзиёевга мурожаат қилди.
Мурожаатда, жумладан, шундай дейилади:
«Муҳтарам Президент жаноби олийлари!
Вақтингизни қадрлайман, шу боис дарҳол мақсадга кўчаман. Ватанимизда кўп соҳада янги ташаббус билан чиқаётганлар сероб, аммо, афсуски, адабиёт ва санъат тараққиётдан анча орқада қолмоқда. Камина 2018 йил октябр ойида мустақил равишда оилам ва дўстларим кўмагида янгича адабий-маданий дастур очдим: ‘Ўзбекистонда чет эллик ёзувчи/рассом резиденцияда’ деб номланади. Уч нафар чет эллик шоир, ёзувчи ва рассом билан бошлаганим ушбу дастурнинг ўтган ҳафта тугаган учинчи даврида 10 нафар чет эллик ижодкор қатнашди. Ҳар йили тўртта шундай ижодий туризм дастурини амалга оширишни кўзлаганман. Шу йилги октябр ойи дастурига эса дунёнинг турли бурчагидан 30 дан ортиқ хорижлик ёзувчи, шоир рассом иштирок этиш истагини билдирди, бу сон кундан кунга ортиб бормоқда».
Муаллифнинг таъкидлашича, чет эллик иштирокчиларнинг ўз юртларига бориб, оммавий нашрлар ва ижтимоий тармоқларда улашаётган ўзбек халқи, унинг маданияти, маънавияти ҳақидаги фикр-мулоҳазалари жуда ижобий. Дунё бўйлаб минглаб ижодкор дўстлари ўз маблағига Ўзбекистонни ўз кўзи билан келиб кўриш, ижодкорлар, халқ билан мулоқот қилиш, ижодий алмашувни йўлга қўйиш истагида.
«Каминани Ўзбекистонда Алишер Навоий, Паҳлавон Маҳмуд, Усмон Носир, Чўлпон каби ўнлаб буюкларимиз асарларининг инглизча таржимони, кўплаб мамлакатларда ўзбек адабиёти ва санъатини чин дилдан тарғиб қилган, турли тилларда китоблар, антологиялар чиқарган, асарлари бошқа тилларга энг кўп таржима қилинган шоир ва таржимон сифатида яхши билишади.
Давлатдан ўзим учун аввал бирон нарса сўраган эмасман, бепул уй, тиббиёт хизмати, дала ҳовли, мукофот деган нарсага кўз ҳам тиккан жойим йўқ. Шаҳар четидаги икки хонали квартирада оилам билан беминнат, камтарин ҳаёт кечиришдан бахтиёрман. Фақат Ўзбекистон адабиёти ва санъатини ривожлантиришга ўз ҳиссамни қўшиш учун Сизга бир илтимосим бор.
Тошкент марказида (ва ё ўзим яшаётган Яшнобод туманида) мустақил равишда (майли-да бир неча йилга чўзилса ҳам), хусусий Халқаро ижод уйи қуришим учун олти сўтих ер ажратиб берсангиз. Ўз маблағимга аста-секин қуришни ният қилганим ушбу Ижод уйида ўзбек шоир, ёзувчи, рассомларига инглиз, немис, француз каби дунё тилларини ўргатаман, уларни халқаро алмашув дастурларида иштирок этишга тайёрлайман, жаҳон адабиёти ва санъатига жадал қўшилишларига кўмаклашаман, чет эллик дўстларимизнинг кўргазмалари, бадиий ўқишларини ташкиллаштираман. Бу уйни том маънода халқаро ижодкорлар тўпланиб, ўзбек адабиётидан йирик адабий таржима ва таҳрир ишларини амалга оширадиган, биргаликда яшаб, ижод қиладиган, фикр алмашадиган катта даргоҳга айлантириш истагим бор.
Илтимос, бу сўровимни Ёзувчилар ё Рассомлар уюшмасига кўриб чиқиш учун йўналтиришмаса, чунки улар мустақил равишда бир нарсани ҳал қила олишига ишониш қийин», — дейди Аъзам Обид.
Изоҳ (0)