Қозоғистонлик журналист Данара Курбанова Facebook’даги саҳифасида Ўзбекистонга қилган саёҳатидан олган таассуротлар билан бўлишди ва бир қизиқарли воқеани сўзлаб берди.
Маълум бўлишича, у ҳамроҳлари билан тушдан кейин ош қилинадиган ресторанни тополмай, шаҳарда адашиб юрган вақтида, тасодифан Яккасарой тумани ҳокими Бахтиёр Шомуродовга дуч келган. Унинг кимлигини билмаган ҳолда, сайёҳлар ундан миллий таомлар ресторанини тавсия қилишни сўраган. Ҳоким уларга ўз тавсиясини бериб, таксига ҳам миндириб юборган, такси пулини тўлаб қўйишни ҳам унутмаган. Бундан ноқулай ҳолатга тушган сайёҳларга эса улар бу ерда меҳмон эканлигини айтиб, «бир куни ўз ватанингизда ўзбекларни учратсангиз, уларга ҳам яхшилик қиларсиз», — деган.
Таксига ўтиргач, қозоғистонликлар ўзларига ҳамсуҳбат бўлган киши Яккасарой тумани ҳокими эканлигини ҳайдовчидан эшитган ва ҳайратдан ёқа ушлаган.
«Биз ўзларини оддий одамлардек тутадиган хорижлик сиёсатчиларга қойил қолишга одатланганмиз, аммо бундайлар ўзимизда ҳам бор. Гап Бахтиёр Шомуродов такси учун тўлаган 1 долларда эмас (ҳа, Тошкентда такси шунчалик арзон). Гап шундаки, бу одам соқчилари билан юргани, бизни эътиборсиз қолдиргани, ўзининг ҳоким эканлигини юзимизга солгани йўқ, шунчаки инсонларча ёрдам берди. Айнан шундай мансабдорлар — ўз мамлакатининг энг яхши пиарчилари. Энди мен Тошкентга яна келишимга ишонаман. Ҳоким Шомуродов нафақат менинг таксимга пул тўлади, у менинг бу шаҳарни севиб қолишим учун асосли сабаб топиб берди. Ва бунинг учун унга катта раҳмат!» — деб ёзади журналист.
Изоҳ (0)